KHAWTHLIR

HSSLC result
MBSE chuan vawiin chhun dar 12 hian Higher Secondary School Leaving Certificate (HSSLC) Examination 2022 result a tichhuak dawn. Result hi Chaltlanga MBSE pisa kawtah leh website - www.mbse.edu.in ah en theih a ni ang.

Tanpuina sem
Planning & Programme Implementation department leh State Institute of Rural Development & Panchayati Raj chuan nimin khan Sekhum community hall-ah Village Development Programme Pilot Project hawnna an buatsaih a, bialtu MLA Dr Vanlalṭanpuia'n a hawng. Hawnna inkhwm hi SIRDPR director Lalhmunsanga Hnamte-in a kaihruai a, Dr Vanlalṭanpuia'n khuai kháwi tur mi panga leh balhla chíng tur mi 15 hnenah ṭanpuina first instalment a hlan a, Rs 50,000 hû hmanrua hlan a ni.

Pipe phûm dawn
SIPMIU chuan June 2, 2022 zing dar 10 aṭanga tlai dar 5 thleng Millennium Centre leh Chanmari (Chaltlang Road) inkarah pipe phûm hna an thawk dawn a; hei vang hian Traffic SP Rodingliana Chawngthu chuan hnathawh tibuai theia lirthei leh bungrua dah phal a nih loh thu a tarlang. Thupek hian hna thawh zawh hma zawng a huam dawn a ni.

Tualthihna dem
Mizoram Pradesh Mahila Congress Committee chuan thuchhuah siamin, May 29, Pathianni tlaia Rosangzuali (28), Serchhip Dinthar Veng, an chenna ina nasa taka sawisak a nih hnua a thi chu pawi an tih tak zet thu leh a kalsan tak a fate leh a chhungte an tawrhpui tak zet thu an tarlang. Rosangzuali kutthlaktu chu a phû tâwka hrem ngei an duh thu an sawi bawk.

Bill pe chhuak har dawn
Power & Electricity department chuan hriattirna ti chhuakin, electric bill siamna software thar hman a nih dawn avangin thla dang aiin May bill an pek chhuah har deuh hlek dawn thu an tarlang.Bill pek chhuah har deuh a nih dawn avang hian Power & Electricity department chuan mipuite hriatthiamna an ngen.

Rabung HSS lawm
Samagra Shiksha hnuaia lak luh thar Rabung Higher Secondary School chu nimin khan Rabung community hall-ah lawmna hun hman a ni a, bialtu MLA Dr ZR Thiamsanga’n a hmanpui. Rabung HSS hi kum 2020-ah VC hmalaknain din a ni a, kum 2022-23 session aṭangin Samagra Shiksha-in a la thar a ni. Pawl 11 lut tur lak mek a ni a, pawl 12 zirlai 18 leh zirtirtu paruk an awm mek.

SEDP sawiho
Lunglei additional DC V Lalruatliana kaihhruaiin nimin khan Lunglei Convention Centre-ah SEDP guidelines leh Village SEDP Committee mawhphurhna inhrilhfiahna hun hman a ni. SEDP ṭanpuina chu chhungkua anga dawn tur a ni a, chhungkaw pakhat aṭangin mi pakhatin a dawng thei a, state leh central sorkar hnuaia thawk nghet awmna chhungkuate a huam lo tih tarlan a ni.