Khaw 101-ah fall armyworm

Mizoram hmun hrang hrangah vaimim ei chhetu pangang chi khat, fall armyworm a puang mek a, Mizorama district tinah hmuh tawh niin, Mizorama khaw 101-ah a puang tih finfiah a ni tawh.

Agriculture depart­ment hotute chuan Vanglaini palai zawhna chhángin, kumina fall armyworm puang chu kum dang aiin a la nasa rih loa an hriat thu an sawi a, "Kum thum lai kan hmachhawn tawh a nih avangin tih dan tur kan thiam tlangpui tawh a, kawng hrang hranga inzirtirna kan kalpui avangin kut hnathawktute pawhin a tih dan tur an thiam tawh hle," an ti a; vaimim thar zatah kum dang aiin chhiatna a thlen tlem an rin thu an sawi.

Serchhip leh Hnah­thial district tih loh dis­trict dang zawngah fall armyworm a puang tih finfiah a nih tawh thu sawiin Agriculture depart­ment hotute chuan, "Serchhip leh Hnah­thialah pawh hian fall armyworm an hmuh thu ṭawngkain kan dawng tawh," an ti.

Fall armyworm ven nan district hrang hranga Agriculture office aṭangin damdawi lâk theih a nih thu te, sukhlo emaw, surf/ sahbawn tui pawh hman theih a nih thu te, loneitute chu an vaimimte uluk taka en ṭhin tura an duh thute an sawi bawk.