Mizoramin hma a sâwn lo hle anga sawi fo hi thu dik lo a ni - K Pachhunga

Bamboo Development Board vice chairman Dr K Pachhunga, MLA chuan, Mizoramin hma a sâwn lo hle anga sawi fo chu thu dik lo a nih thu a sawi.

Nimina Mizo Hnam Runa inkhawmah thu sawiin K Pachhunga chuan, “Kan ramin hma a sâwn lo hle anga kan sawi fo hi thu dik lo a ni. Inkalpawhna kawng ṭha, ei leh bâr hnianghnâra kan hmuh theihna atana taima taka thawk mek sorkar kan ni. Zirna lamah hma kan sawn zel a, hmarchhaka university nei ṭha ber zinga mi kan ni a, kan college-te pawhin grade sang zawk an hmu mek zel a ni,” a ti.

Dr K Pachhunga chuan, mipui duh dan ni hauh loin hripui a léng tih sawiin, “MNF sorkar vanga hripui hi leng a ni lo a, khawvel hmun tinah he hri hian mi zawng zawng min tibuai a, sorkar zawng zawngin inrin lâwkna nei loin, a ṭha ber tur nia kan hriat angin kan hmachhawn a ni,” a ti a; hruaitute thawhrimna avangin hripui vanga thi Mizoramah an tlem niin a sawi.

MNF-in MLA 28 an neih theih chhan chu mi rilruah khawngaihna a awm avang leh Pathian remruat a nih thu sawiin K Pachhunga chuan, “Mi zawng zawng duh ber kan nih loh avangin social media-a beihna kan tâwk ṭhin hi thil mak a ni lo a, social media-a inbeihna hian a tak ram a thleng ngai lo,” a ti a; hnathawh ṭha lo leh tlo lo tak takte chu Congress sorkar laia thawh niin a sawi bawk.