Rualbanlote puala loan pek rulh that loh vangin loan dang hmuh a harsa

National Handicapped Finance and Development Corporation (NHFDC) kaltlanga rualbanlo mi 111 hnena loan pek aṭangin la rulh loh Rs. 23,25,827.59 a awm a, loan hi an rulh theih tawh loh avangin NHFDC aṭanga loan dang la leh turin harsatna an tâwk mek. Tun dinhmunah Mizoramah rualbanlo mi 15,160 an awm.

NHFDC hian rualbanlote'n eizawnna an neih theih nan leh an intunnunna atan kum 2009-2010 khan Mizoram tan loan nuai 50 a rawn pe a, Mizoram Rural Bank (MRB) chu agency-ah ṭangin, Mizoram sorkara Finance department chu guarantor-ah a ṭang.

Rualbanlote tana loan lak hi Finance department chuan a rulhsak thei bik lo a, loan dang la leh turin guarantor-ah a ṭang ngam tawh rih lo bawk. Person with Disability (PwD) hotute chuan rualbanlote'n MRB-a an loan rulh tur chu Mizoram sorkarin a rulhsak thei a nih chuan NHFDC-in loan dang cheng nuai 27 rawn pek leh a tum chu lak leh theih reng a nih thu Vanglaini an hrilh.

PwD hotute sawi danin, kum 2009-10 khan NHFDC chuan Mizorama rualbanlote eizawnna leh intun nunna atan mi 111 hnenah loan pek a ni a, loan la tur thlangtu chu Social Welfare department a ni.

Rualbanlote hian eizawnna tur chi hrang hrang - vawk vulh, two wheeler workshop, lu mehna, dawr tê, workshop leh thil dang dinna atan an hmang. Loan latu mi ṭhenkhatin an rulh ṭhat loh avangin loan dang nuai 27 rawn pek leh tur pawh lak theih a ni tawh rih lo.

Loan hi a pung a tlem a, ṭha taka an rulh theih nan MRB leh Social Welfare-te chuan theihtawp an chhuah a, mi eng emaw zatin rûl tawh mah se, tun dinhmunah chuan a harsa hle tawh niin an sawi.

Hetih lai hian, Finance department hotute chuan, rualbanlote dinhmun chu an lainat viau laiin, loan rul ṭha lo an tam avangin pawngpaw rulhsak ngawt chu state leiba a pun nasat zel avang leh uluk taka ngaihtuah a ngaih avangin a harsa rih niin an sawi.

MRB hotute'n Vanglaini palai an hrilh danin, NHFDC, MRB leh Social Welfare department-te'n loan la tur hian MoU an ziak. Loan latu mi 111 zingah tun thlengin a zatve aia tem hret (51%) an rûl tawh.

Loan hi mipa tan 5% leh hmeichhe tan 4%-in a pung a, chutih laiin, mi pangngaite hnena loan an pek pung 12.5% leh 13% te a ni. Tunah hian mi 111 zinga mi 37 chiahin an la rûl a, mi 74-in an la rûl lo.

Mizoram sorkar chuan loan chu a latute'n 70% tal rûl se an duh a; loan latute'n an rulh theih tawh irh loh avangin sorkar chu quarantor-ah a ṭang ngam tawh rih lo a, December 5, 2013-ah guarantor a nih chhunzawm zel theih loh thu a tarlang.

MRB hotute chuan, NHFDC aṭanga loan tur cheng nuai 50 an hmuhte chu a vaiin an pe chhuak tih sawiin, "NHFDC-in February 8, 2012 thlenga loan kan pek zawh hman loh avangin kan pek bâng zawng pe kir turin min ti a, Rs. 8,60,500 chu kan thawn kir. Nuai 50 aṭangin Rs. 41,39,500 chiah rualbanlote hnenah loan kan pe hman a ni," an ti.

MRB hotute chuan, loan an pekte'n an rulh tur Rs. 23,25,827.59 chu NHFDC-ah an peksak vek tawh thu te, pawisa chu loan latute hnenah an ṭhìn chhunzawm zel a ngaih dawn thu te an sawi.

MRB-in rualbanlote tana loan an pek chhuahnate chu - Aizawl Branch, Khatla Branch leh Chanmari Branch bakah, Lunglei, Champhai, Serchhip, Kolasib, Saiha, Lawngtlai leh West Phaileng Branch aṭangtein a ni.

Loan an pek chhuah chu a pung tur nena an chhûtin Rs. 4,759,039.59 a ni a, chuta ṭang chuan rualbanlote'n Rs. 24,33,212.00 an rûl tawh a, la rulh hmabak chu Rs. 23,25,827.59 a ni. Loan an pekte chu mi pakhatah Rs. 1,00,000, Rs. 50,000 leh Rs. 25,000 a ni tlangpui.

Kum 2011 chhiarpuia Mizorama rual­banlo dinhmun chhinchhiah danin, Mizo­ramah rualbanlo mi 15,160 an awm a, chu chu state puma mihring awm zat 1,097,206 aṭangin 1.3% an ni. November 2016 thlenga rualbanlo ID leh certificate sorkarin a pek chhuah tawh zat chu 10,143 a ni thung.