KṬP Rorel Inkhawm vawi 7-na a ṭiak

KṬP General Confe­rence awm loh kuma neih ṭhin, KTP Rorel Inkhawm vawi 7-na, Bawngkawn Kohhran biak-ina Zirtawpni zana ṭan chu Inrinni leh nimin khan chhunzawm a ni a, nizan khan a ṭiak.

Inrinnia rorel inkhawm chu Central KṬP leader Rev. Zothansanga'n a kaihruai a, rorel palai 866 an tel.

Kum 2019-a rorel inkhawm neihna atan Tuikual North Kohhran biak-in an thlang a, kum 2017-18 kumpuan thupui atan 'Khawvel mamawh Isua Krista' (Phil 3:20) thlan a ni. Kum 2017-18 budget atan Rs. 59,68,000 an pawm.

An thurel dang zingah, Youth Recreation Centre (YRC) pualin KṬP member tinin kum hmasa lama an thawh zat ang thawhlawm thawh leh te, kohhran humhalhna lam hawi booklet siam te, KṬP ṭum khat inkhawm thawhlawm Synod Charity Fund tana pekl te, chhawmdawlna pualin Thawhṭanni zan inkhawm vawi khat thawhlawm pek te, kum 2017 chhungin member hlate pual, Assembly inthlan pual leh ram tana chaw ngheia ṭawngṭai rualte a tel.

Zu ṭhat lohzia inzir­tir tura hmalak, ṭhalai­te ruihhlo leh mipat hmei­chhiatna hman khawlohna laka an fihlim theih nan leh HIV/AIDS awareness campaign hawi zawnga hmalakte an rel bawk a; Central KṬP bawh turin an dah.

Report-a a lan danin, KṬP-ah hian December 31, 2016 thleng khan pas­tor bial 199-ah branch 844 a awm a, member mipa 90,505 leh hmeichhia 54,415, an vaiin mi 1,44,920 an awm. Pastor bial 11, branch 44 leh mem­ber 3,772 chu Mizo­ram pawna mi an ni.

KṬP Dinhmun (December 31, 2016 angin)
Bial zat 199
Branch zat 844
Member zat 1,44,920
Mipa 90,505
Hmeichhia 54,415
Member tamna ber bial Ramhlun North (2,297)
Member tlemna ber bial Buarpui (46)
Member tamna ber branch Mission Veng (1,497)
Member tlemna ber branch Peren, Kohima (3)
2016-a member thi 466
Mipa 417
Hmeichhia 49
2016-a nupui/ pasal nei zat 3,594
Bial sum hmuh belhkhawm Rs. 3,09,28,199
Branch sum hmuh belhkhawm Rs. 21,31,83,429
Inkhawm zat chawhrual 23.34%