MZP-in Zoram Ni an hmang

MZP chuan Inrinni khan Aizawla MZP pisa conference hall-ah Zoram Ni an hmang a, khaw dang ṭhenkhatah hman a ni bawk.

MZP-in Zoram Ni an hman ṭhin hi March 5, 1966-a India sipaite'n thlawhtheihna hmanga Mizorama bomb an thlak champha hriatrengna atana tih a ni a, kuminah chuan March 5 hi Pathianni a nih avangin March 4-ah an hmang a, thupui chu ‘Mizo nationalism - Zofate inpumkhatna’ tih a ni.

Zoram Ni an hmanna inkhawm hi MZP vice presi­dent Vanlaltana'n a kaihruai a, general secretary L Ramdin­liana Renthlei-in report pein, president Lalsangzuala Ngente-in thu a sawi a; MZP adviser VL Krosshnehzova'n thupui a sawi.

MZP President chuan, Zoram Ni chu political party leh pawl dangte tihthinurna atan leh tute emaw tana rilru nat tharna tura hmang an ni lo tih a sawi a, "Kan hman chhan chu, Zofate tan inpumkhat leh zual nan te, kan tawrhna avangin inunauna ṭha leh Zofateah impumkhatna ṭha thleng se kan tih vanga hmang kan ni," a ti a; Mizote chu ṭawng vang ni loin, thisena unau an ni tih vawng tlat turin a sáwm a ni.