Housing for All hmu lo turin an hmuh chuan kan cancel ang - Zodintluanga

UDPA minister Zodintluanga chuan Inrinni zing khan Kolasib Circuit House-ah press conference a nei a; UDPA hnuaia kalpui ṭan, khawpui mi harsa in sak ṭanpuina, PMAY - Housing for All kalpui dana Kolasib-a harsatna awmte a sawifiah a, "Housing for All hi a hmu lo turin an hmuh chuan kan cancel ang," a ti.

Zodintluanga chuan, PMAY hnuaia in sak ṭanpuina Kolasib-a dawng tur zingah RCC building nei an tel tih hriat a nih thu sawiin, "Harsa ngawih ngawih diltu list-a tel tarlan ve lohte leh chhungkaw khat aṭanga pali telte an awm tih kan hria a, a bul aṭangin kan rawn endik leh vek ang," a ti a; V/C leh YMA-te nen an endik leh dawn tih sawiin, PMAY chu induhsakna scheme a ni lo a, a mamawhte dawn tur scheme a nih thu a sawi.

PMAY dawng tur thlanna uluk leh fimkhur taka kalpui a ni chungin, a thlangtute'n tihfuh loh an nei zauh zauh tih sawiin Minister chuan, "Uluk takin kan kalpui a, tihsual neuh neuh kan nei. Kan insiamrem zel a, concrete building neite thlan zinga an tel chuan scheme an dawn hmain kan cancel sak vek ang. Mi rethei harsa in sak mamawhte erawh kan telh ang," a ti.

Housing for All chu duhsakte thlanna tur a ni lo a, a mamawhte dawn tura hmalakna a nih thu sawiin, Zodintluanga chuan, "A mamawh pek tur a ni a, politics-a duhsakte pekna tur a ni lo. Mamawh si, in sakna nei lo si tan a ni," a ti a; phase wise-a kalpui a nih avangin a tahtawla kalpui a ngaih thu a sawi.

Sports & Youth Services Minis­ter hian Inrinni vêk khan Kolasib-a stadium sak mek chu a hmunah tlawhin a enfiah nghal a; Kolasib diatrict MJA-te'n an ṭawiawm a ni.