KHAWTHLIR

Thisen pe
Mizoram UPC ṭhalai, PYD-te chuan Inrinni khan Aizawl Civil Hospital tan unit 100 an pe a, a petute mipa 87 leh hmeichhia 13 an ni. Serchhipa Mizoram PYD-te'n Serchhip District Hospital-ah unit 28 an pe a; Mamita PYD-te'n unit 10 an pe. Black Bumperz (800 Lovers) Lunglei-te pawhin Lunglei Civil Hospital-ah unit 11 an pe bawk.

Kawng hawng
Lunglei DC K Lalrohlua chuan, Inrinni zing khan Zotlang Venga DC link road a hawng. Kawng hi metre 1,275-a thui a ni a, PWD-in metre 570 leh Lunglei District Innovation Fund aṭangin metre 330 blacktop a ni tawh a, metre 375 blacktop hmabak a la awm.

Inkâp hlum
C Zonunmawia (19), Bawngkawn North chu Inrinni zan khan an chenna inah a pa C Malsawma (56) chuan a kâp hlum. Bawngkawn Police Station aṭanga thu dawn danin, C Malsawma hi man a ni tawh a, thil thlen dan zawhfiah mek a ni.

ECM Assembly
Evangelical Church of Maraland (ECM) Assembly vawi 94-na, March 1, 2017 zana Zawngling ṭan chu nizan khan a ṭiak. Inkhawmpui hian kum 2018-a ECM moderator atan Rev. VL Ngaia Hlychho an thlang. Nimin chawhmaa inkhawmah probationary pastor pathum nemngheh an ni.

NSS Festival
March 6-10, 2017 chhung hian Itanagar, Agartala-ah North East NSS Festival, 2017 neih a ni dawn a, Mizoram aṭangin State NSS Officer Zirlianngura hoin college leh higher secondary aṭangin volunteer 28 leh programme officer pahnih an tel dawn. Mizoram aṭanga tel turte hian Mizoram an chhuahsan tawh a; Festival chhung hian cultural item, awareness programme-te neih a nih dawn bakah, field visit neih a ni ang.

Jt. NGO thlawp
Hachhek Constituency Development Committee (HCDC) tun hnaia ṭhukhawm chuan, Tripura refugee camp-a Bru laklet chungchanga hmalakna awm mekah Joint NGO's hmalakna an thlawp thu tarlangin, "Bial tana pawi thei hmalakna a awm a nih chuan HCDC chuan a ṭul angin hma a la zel dawn," an ti.