High Court building tur lungphùm phúm

Chief minister Lal Thanhawl­a leh Gauhati High Court (GHC) chief justice Ajit Singh-te chuan, Inrinni khan Gauhati High Court, Aizawl Bench building sakna tur lungphùm an phúm.

GHC building sakna tur hmun chu Raj Bhavan atana ruahman hmasak a nih thu sawiin Chief Minister chuan, "Building sak hi Governor awm tawh ṭhinte'n luah tlakah an ngai lo a, hei hi GHC tan malsawmna a ni," a ti a; building ṭha leh changtlung, Mizoram leh mipui tana chhuan­awm tak sak a nih ngei a beisei thu a sawi.

CM Lal Thanhawla chuan, dan rorelna chu hleih nei loa dan lalna awmtirtu a nih thu sawiin, "Court-te hi ram danpui enkawltu, mawphurhna lian ber nei an nih angin thubuai hlabuai remna forum pawimawh ber leh dan siam reng rengte hleih nei miah loa a dik taka dan kengkawhtute an ni. Inrem lote inremtirtu leh mipui dikna leh chanvo humhalh­saktute an ni," a ti.

Gauhati High Court chief justice Ajit Singh pawhin thu sawiin, "Thubuai neite leh thubuai ngaihtuahtute mamawhna sang cho zel ngaihtuahin High Court building thar Mizoramin a nei tur hi a lawmawm ka ti hle," a ti a; GHC, Aizawl Bench-in hmun nghet neih an suangtuahna chu a taka a chan avangin Court tan thil lawmawm tak a nih thu a sawi.

GHC, Aizawl Bench building tur hi block pali - A, B, C leh D-ah ṭhen a ni dawn a; block A, B leh C zau zawng belhkhawm chu sq. metre 11,612.98 a ni a, block D zau zawng chu sq.metre 274.18 a ni.

Building sakna atan hian cheng nuai 4624.12 ruahman a ni a, sum hi DoNER-in 90% tumin, Mizoram state sorkarin 10% a tum dawn. DoNER hian first instalment cheng nuai 1471.90 a rawn pe chhuak tawh a, Mizoram sorkar pawhin a tum tur cheng nuai 163.54 a pe chhuak tawh. Kum thum chhung­a sak zawh tura ruahman a ni.