Central hotute'n SIPMIU hnathawh an enfiah

Sorkar laipuia Urban Development Ministry-a director Parmod Kumar leh Program Management and Monitoring Consultant leader Pritam Kapoor-te chuan March 3, 2017 khan Aizawla SIPMIU hnathawh hrang hrang a hmunah an enfiah.

Urban Development Ministry hotute hian Chite lui kama Sewerage Treatment Plant siam mek te, Armed Veng leh Electric Venga sewerage pipe network siam te, Falkland Venga septic tank khat thei lo (bio digester) siamna hmun te, Tuiriala Solid Waste Resource Center leh Zemabawka tui pipe phûmte an enfiah a ni.

SIPMIU hnathawhte a hmuna an enfiah hnuah Aijal Club-ah an inkâwm a; Urban Development Ministry hotute chuan, SIPMIU hnathawh chu an ngaihven reng thu te, report an pek atanga an hnathawh dan an lo hriat ve zel theih thu leh, chak zawk leh rang zawka hna thawh a nih theih dan turte an sawi.

SIPMIU hian Sewerage Treatment Plant an siam mekah 78% vel an zo tawh a, sewerage network (pipe phûm) bik chu 40% vel an zo tawh a ni.