MNYF-in NIAS chhui tura ruat mipui bum tumnaah ngai

MNF ṭhalaite chuan thuchhuah siamin, Nalanda Institute of Advance Studies (NIAS), Kolkata-a zirlai tirh leh a kaihhnawiha thil dik lo chhui tura Chief Minister nuphal ruat a ni chu Mizoram mipui bum tumnaa an ngaih thu an tarlang.

MNYF chuan, NIAS-a thil dik lo awmte chhui chhuak turin CBI emaw, Judicial Enquiry emaw, Magisterial Enquiry emaw, opposition MLA-te telna Enquiry din a nih mipuiin an rin ṭhup thu an sawi a, "CM Pu Hawla nuphal Lalchhunga, IPS (Rtd.) hoa chhui tura Mizoram sorkarin order a siam hian Zoram mipui min barakhaih hle," an ti.

NIAS chhui tur Enquiry Commission din chuan minister leh MLA-te dik lohna chhui chhuah an tum lo ang tih chu mipui rin dan awm sa nia sawiin, MNYF chuan, "Minister leh MYC Chairman báng tawhte thiam chantirna tura Mizoram sorkar drama phuah mai ni-ah kan ngai," an ti a; Minister leh MYC Chairman bángte'n an bàn paha zalen taka chhui an nih theih nana báng an nih thu an sawi thlazen chu mipui bum tumna a nih thu an sawi.

MNF ṭhalaite chuan, NIAS chhui tura tihin a chhui chhuah dan tur chu thil langtlang sa veka an ngaih thu sawiin, "Eng pawh an thil chhui result hi lo chhuak mah se, kan pawm lo lâwk sa tih Zoram mipuite hriatah kan puang lâwk a ni," an ti.