CS pisa kái tur dan ṭhulh rih a ni ; NGO-in an ngaihtuah ṭha leh dawn
Pawl panga - Central YMA, MUP, MHIP, MZP leh MSU intêlkhawmna NGO Coordination Committee (Joint NGO) chuan May 31, nimin aṭanga chief secretary Dr Renu Sharma pisa kái tur dan an tum chu Chief Secretary a zin dawn avangin an ṭhulh rih a; Chief Secretary zin a rawn kîr hunah Joint NGO chuan an kal zel dan tur an ngaihtuah dawn.
Tarlan tawh angin, May 30, Thawhṭanni chhun khan Joint NGO-te hian Aizawl Press Club-ah thuthar thehdarhtute kâwmin, chief secretary atana Mizo dah tura an ngenna sorkar laipuiin an tihhlawhtlin loh avangin May 31, 2022 aṭangin tiam chin awm loin chief secretary Dr Renu Sharma pisa kái tur an dan tur thu an puang. Renu Sharma hi nimin khan a zin dawn avangin dan an tum chu ṭhulh rih a nih thu May 30 vek zanah an puang leh a ni.
Chief Secretary dan an tum an ṭhulh chungchangah NGO Coordination Committee chuan May 30 zan khan hriattirna tichhuakin, "Naktuk 31.5.2022 zing dar 8:30 aṭanga chief secretary Dr. Renu Sharma pisa kai tur dan an tum chu Chief Secretary a zin dawn avangin an ṭhulh rih a ni," an ti.
Tour programme-a a lan dan chuan, Dr Renu Sharma hian nimin khan Lengpui Airport aṭangin Delhi a pan a, vawiin hian Delhi-ah Meeting of UIDAU National Worksho-ah telin, naktukah Mizoramah a rawn kîr leh nghal ang.
Vanglaini palai zawhna chhangin Joint NGO secretary Prof. Lalnuntluanga, Central YMA general secretary ni bawk chuan, Renu Sharma chu a fate inneihnaah a tel dawn avangin a thang rei dawn nia an hriat thu a sawi a, "Kan kal zel dan tur chu a rawn kîr leh hunah kan ngaihtuah ṭha leh ang," a ti.
Dr Renu Sharma hi sorkar laipui chuan October 28, 2021 khan Mizoram chief secretary atan a ruat a, November 2, 2021 khan chief secretary mawhphurhna hi a chelh a ni.