HSSLC Examination 2022 laiin Covid-19 vei mi 127 hmu chhuak

MBSE chairman JH Zoremthanga chuan, Higher Secondary School Leaving Certificate (HSSLC) Examination 2022-a pass-te a lawmpui thu a sawi.

JH Zoremthanga hian nimina result tihchhuah a nih hnuah thuthar thehdarhtute a kâwm a; Covid-19 vanga exam tluan thei lo zirlai an tam thu sawiin, "Covid-19 vang hian theory exam laiin mi 52 leh practical exam laiin mi 75-in an exam tluan thei lo a, an tan hian compartmental exam rualin special exam kan buatsaih dawn," a ti. 

HSSLC result chu kum hmasa aiin a ṭhat loh thu sawiin JH Zoremthanga chuan, "Kum hnih chhung Covid-19 avangin zirlaite'n sikulah zirna pangngai an nei thei lo a, hun tam zawk online-a an kal avangin subject ṭhenkhat - mathematics/arithmetic leh hmaichhana inzirtir ngai bik subject-ahte an fail nasa," a ti a; hmun ṭhenkhat, phone signal awm mumal lohnaah chuan zirlaite'n harsatna an tawh nasat thu leh an result-ah nghawng a neih thu a sawi.

MBSE Chairman hian zirna sang zawk chhunzawm tumte tan harsatna a awm loh nan result compalint hun chu ni sarih chhung, June 7, 2022 thleng hawn a nih dawn thu a sawi a ni. JH Zoremthanga chuan, HSSLC syllabus chu India ram pumah a inanga hman a nih thu sawiin, "Session tharah chuan Covid-19 lên hma angin syllabus leh exam kan kalpui leh tawh ang," a ti a; centre superintendent leh invigilator-te'n khauh taka inkaihhruaina an kalpui avangin exam laiin zirlai hnawh chhuah an awm loh thu a sawi.

HSSLC exam result tihchhuah a nih theih nana hma latu - Mizoram sorkar, SEC, School Education department, HSSLC zirtirtu te, HISSLAM, MISA, LTF/VTF, MISSTA leh MBSE thawktu zawng zawngte chungah lawm thu a sawi. Zirlai pass-te a lawmpuiin an kal zelna turah duhsakna a hlân a, pass lote chu ṭhahnemngai taka zir chhunzawm turin a chah bawk.