PM-in mipui chawikanna scheme a puangzar ; Mizoram hmun hrang hrang aṭangin chhim a ni

Nimin khan prime minister Narendra Modi chuan India independent vawi 75-na lawmna, Azadi Ka Amrit Mahotsav kal zelah sorkar laipuiin mipui chawikanna tur scheme hrang hrang a neihte Shimla, Himachal Pradesh aṭangin puanzar a ni a, Mizoram aṭangin chief minister Zoramthanga hoa chhim a ni. Prime Minister hian beneficiary-te video conferencing hmangin a kawm nghal.

Prime Minister thusawi hi CM Zoramthanga chuan a pisa aṭangin a chhim a, Aizawl DC pisa chuan he hun pual hian Vanapa Hall-ah inkhawm an buatsaih a, Assembly speaker Lalrinliana Sailo hoin sorkar hotute an tel.

Assembly Speaker chuan, mi tin hnena hmasawnna a thlen theih nan India sorkarin hma a la tih sawiin, "Mizoram pawh tel vein, scheme hrang hrang hlawhtlinna tur hian sorkar leh mipui kan ṭan tlân a ngai tak meuh. Programme leh scheme hrang hrang sorkar laipuiin ṭang takin a rawn kalpui a, mahni state-ah ṭheuh state sorkarte'n a takin kan kalpui a ni," a ti.

Scheme hrang hrang hlawhtlinna tura thawktu sorkar hnathawkte'n an tih ṭhat thu sawiin Lalrinliana Sailo chuan, "Sorkar laipui chuan mipui hne hnai thei ang ber turin 'Sabke saath sabka vikas' tih thupui hmangin mipui hmasawnna turin ṭan a la nasa hle," a ti a; Mizoramah hmasawnna tak tak thleng turin mipui thleng phâk hmasawnna hna chak leh zuala thawh a pawimawh thu a sawi.

Inkhawm kaihruaitu Planning secretary Lalmalsawma Pachuau chuan, Azadi ka Amrit Mahotsav a sawifiah a, "He programme hi March 12, 2021-ah bul ṭanin, August 15, 2023 thleng, chawlhkar 75 chhung ram pum huapin a chher chhuana lawmna leh hmalakna péng tam tak buatsaih a ni," a ti a; Mizorama hman tlangpui a tarlang.

Lalmalsawma Pachuau chuan, hmabak chi thum - Har Ghar Jandha, August 9 - August 16, 2022 chhunga in tina India flag zâr te, Amrit Sarovar - thingtlanga tuihna siam leh tihpunte leh, Law and Judicial hmalakna tur De-criminalisation of laws for ease of living and ease of doing business tihte a la awm thu a sawi.

Inkhawmah hian Aizawl DC office, Rural Development, Agriculture, Women and Child Development, UDPA, PHE leh Health department te, lead bank leh Indian Oil Corporation aiawhte'n mipui hmasawnna tura sorkar laipui scheme leh programme an kalpuite puanzarna hun an hmang. Beneficiary kal khawm hmaah scheme hrang hrang an kalpui dan sawifiahin, mipuiin an chhawr ṭangkai theih dan tur an kawhhmuh a ni.