Sorkar thar siam ngei a ṭul tawh - Lalduhoma

ZPM leader Lalduhoma chuan, Mizoram kalphung leh dinhmun thlirin, sorkar thar siam ngei ngei a ṭul tawh thu leh ZPM thil tum chu Pathian hriatpui tlâk ram rorelna kalphung thar sorkar din a nih thu a sawi.

Nimina Hrangturzo biala ZPM East Block leh West Block joint conference, Khawlailung Bazar Veng futsal ground-a neihah Lalduhom chuan, kalphung thar mipui sorkar siam tura theihtawp chhuah turin kal khawmte a chah a, "Kan ram kalphung leh dinhmun thlir hian sorkar thar siam ngei ngei a ṭul tawh a, chumi atan chuan ZPM chu a inpeih tawh a, tlachawp ni loin, ruahmanna felfai leh mumal taka kal turin a inpeih tawh a ni," a ti.

Lalduhoma chuan, sorkar ṭha siam turin roreltu ṭha neih a pawimawh tluk thoin sorkar kalphung ṭha a pawimawh thu sawiin, "ZPM thil tum chu Pathian hriatpui tlak ram rorelna kalphung thar sorkar din a ni a, chu chu ZPM din chhan pawh a ni," a ti a; kalphung ṭha lo hnuaiah chuan sorkar ṭha a neih theih loh tih a sawi.

ZPM Leader chuan, Mizorama thuneihna inchan chhâwk ṭhinte chungah mipui thla a muang zo tawh lo nia sawiin, "Politics thuneihna hmanga sakhua leh hnam venghim zawnga ṭan la thei sorkar kan mamawh ta hle. Kalphung ṭha lo laite paih a, kalphung thara thlak a, party sorkar ni lo, mipui sorkar siam hi a ni a, party dangte aiin kan ṭha zawk tiin kan inzuar lo a, 'Kalphung thar, mipui sorkar’ kan zuar zawk a ni," a ti.

ZPM MLA Dr Vanlalthlana pawhin thu sawiin, "Corruption hi natna a nih chuan langtlang taka hmalakna hi a damdawi chu a ni. Kalphung ṭha hmangin mihring a siamṭhat theih a, corruption leh induhsakna hleihluak pawh hi kalphung thar hmangin ZPM hian a tireh thei," a ti a; ZPM kalphung tharah mipui na tihdamna a awm thu leh chutah chuan mipui damna turin vote thlak mai a tâwk thu a sawi.

Inkhawmah hian Lalduhoma chuan ZPM zawm thar mi 713 a lawm lut niin ZPM thuchhuah chuan a tarlang.