Manipur-a Zo fate ram chhuhsak tum kan dodal zel dawn - ZORO

Zo Re-Unification Organisation (ZORO) chuan Manipur-a Zo fate ram chhuhsak tumna a awm thu sawiin, "Zo fate chanvo chhuhsak kan remti ngai dawn lo," an ti.

ZORO hruaitute chuan nimin khan Aizawl Press Club-ah thuthar thehdarhtute kâwmin, Manipur-ah Zo fa tam tak an chên thu an sawi a, "Anni hi hmakhawsang aṭanga he lai ram luahlum hmasatu, ram neitu dik tak (indigenous people) an ni. An ram hi an luh hmain Meitei ram a ni ngai lo, British-in Meitei nen awp khâwmin Manipur hnuaiah a dah a, British an chhuah hnuah Manipur hnuaiah an awm chhunzawm zêl avangin an awmna ram hi Meitei ram a ni ngawt lo," an ti a, an ram chu tu'ma chhuhsak theih a nih loh thu an sawi.

Manipur state chhunga Zo fate ram eng emaw zât chu sorkarin chhuhsak tumin finrawl a chhuah a, reserved forest-ah a puang tih sawiin ZORO hruaitute chuan, "Hei hi India dân kalh leh United Nations Declaration on the Rights of Indigenous Peoples (UNDRIP) Article 10 bawhchhiatna a ni. Zo fate ram nêk hi kan ngai thutak hle a; hetianga Zo fate nêkna rêng rêng chu kan dodal tlat zêl dawn. An chanvo dik an hmuh theih nan leh an dikna tlangaupuina turah theihtawp chhuahin kan ṭang zel dawn a ni," an ti.

ZORO hruaitute chuan, Manipur sorkarin Zo fate ram chhuhsak tuma finrawl tinréng hmanga a chêtna chu huaisen taka dodâl a, social media hmanga thu thehdarhtu Dr Mark Thangmang Haokip chu chhuanawm an tih thu sawiin, "Manipur sorkarin a man a, a hréngbet hi ZORO chuan a dem tak zet," an ti a, thu delhkilh awm loa rang taka chhuah zalên turin an phût a ni.