Hripui vei mi 106 (0.04%) chiah an awm

May 30, Thawhṭanni khan Mizoramah Covid-19 vei mi 19 hmuh chhuah a ni a, positivity rate 6.01% a ni. Nimin khan hripui vei dam tawh mi 36 chhuahtir an ni a, nimin tlai khan hripui vei enkawl lai mi 106 (0.04%) chiah an awm tawh.

Thawhṭannia Covid-19 positive hmuh tharte chu mipa pariat leh hmeichhia 11 an ni a; RAT hmanga hmuh chhuah vek an ni. Kumin May thlaah hripui vei mi 864 hmuh a ni tawh.

Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a, a záwnin ni 11 chhung thi an awm tawh lo.

IDSP record angin, Mizoramah Covid-19 vei 2,28,317 hmuh chhuah a ni tawh a, mipa 1,06,302 leh hmeichhia 1,22,015 an ni a, mipa aiin hmeichhia 15,713-in an tam zawk. Nimin tlai dar 5 thleng khan mi 2,27,513 (99.65%) chhuahtir an ni tawh a, mi 698 (0.31%) thi tawhin, enkawl mek mi 106 (0.04%) an awm.

Nimin tlai dinhmun angin, Mizoramah hripui vei enkawl lai tamna ber Aizawl district-ah mi 29 an awm a, district pahnih - Siaha leh Lawngtlai district-ah hripui vei an awm rih lo.

Kum 2011 chhiarpui angin, Mizorama hripui vei hmuh tawh 2,28,317 chu mi 1,000 zela Covid-19 positive 208 an awm ang a ni a; mi 1,00,000 zelah hripui vanga thi mi 63 an awm ang a ni bawk.