KHAWTHLIR

Electric bill chhuak tlai dawn
Power & Electricity department chuan electric bill siamna software thar an hman ṭan dawn avangin kumin May thla electric bill an pe chhuak har deuh dawn tih an tarlang a; mipui hriatthiamna an ngen a ni.

Tualthihna dem
MHIP Sub-Headquarters, Serchhip leh PC Women Wing chuan thuchhuah siamin, May 29, 2022 tlaia Rosangzuali, Serchhip Dinthar Veng, a pasal Zobiaksanga'n na taka kutthlaka a sawisa hlum chu pawi an tih thu leh an dem thu an tarlang. Zobiaksanga chu a na thei ang bera hrem ngei an phut thu an tarlang bawk.

Heroin man
Mizoram Police CID (Crime) hnuaia Special Narcotics PS Team chuan nimin khan Vaivakawn Zohnuai, Mizoram University kawngah heroin gram 183.67 an man a, a neitua puh Zamkhanmung (20) h/o Khaisianhmuang, Bulfek, Myanmar an man nghal bawk.

Sikul tlawh
Minister of state TJ Lalnuntluanga chuan nimin khan a bial Champhai South chhung, Champhai Kanan Venga R Hranga High School leh Electric Venga Champhai South HSS-te a tlawh. Minister chuan, zirlaite chu social media chak tak leh thu léngvâk tam tak awm karah thu dik tâwk lo leh belhchian dâwl lo laka inthiar fihlim turin a chah.

Pass-te lawmpui
Zirlai pawl pathum - MZP, SSU leh NSUI-te chuan thuchhuah siamin, MBSE-in HSSLC Examination 2022 result felfai taka a tichhuak chu lawmawm an tih thu leh MBSE-a thawkte fakawm an tih thu an tarlang a; pass-te an lawmpui rualin, pass lote chu beidawng loa zir zel turin an chah.