Grape chíngtute'n a tawp thlen inhuam ; An MLA-te nena sawiho hun an nghak

Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS)-te chuan grape wine man a nih chungchangah a tawp thlenga ṭan an tum thu an sawi nawn a, hetihlai hian an bialtu MLA-te nen an sawiho dawn a, "Sawiho hun kan nghak mek a, chumi hnuah kan kal zel dan tur kan rél ang," an ti.

Vanglaini palai zawhna chhangin grape chíngtute chuan, an MLA-te'n hma an lakpui tur thu an hrilh tih sawiin, "Rawn zin chhoh a, sawihopuiah min sáwm a ni. Eng thu nge an rawn ken dawn kan hre bik lo a, an thu rawn ken azirin kan hmalak zel dan tur chu kan rêl ve leh ang," an ti a; sorkar aṭangin official-a thu dawn an la neih loh thu an sawi.

Grape chingtute hian hnungtawlh thei an nih loh thu an lo sawi tawh a, "A tawp thlengin kan ṭang dawn," an ti.