Congress leh MNF ni lo sorkar siampuiah Lalduhoma'n Mizo mipuite a sawm

ZNP president Lalduhoma chuan nimin khan Aizawl Press Club-ah thuthar thehdarhtute a kâwm a; MNF leh Congress party kaihhruai ni lo sorkar an awm theihna atana pên chhuak turin Mizo mipui a sáwm.

Tunlaiin Congress ni lo, MNF ni lo sorkar a pian theihna turin, kil hrang hrang aṭangin mi ṭhahnemngaite'n hma an lak thu sawiin Lalduhoma chuan, "Chutiang sorkar piantirna atan chuan tun hun tluka ṭha leh remchang a awm chuang lo ang. A hrang tê têa kan kal erawh chuan awmzia kan nei dawn lo. Sorkar thlakna atana mipui rinngam leh rintlak ni tura kan intelkhawm a ngai a ni," a ti.

ZNP President chuan, mipui, a bik takin mi harsa zawkte policy ṭha leh hruaitu ṭha zui ngam lo khawpin an thluak sûksak an ni tawh tih sawiin, "Mahni ngaihdan pawh tilang ngam loin, sorkarna lama tel loh hlauin an khur mek a ni," a ti a; mipui chhanchhuak turin mithiam rualte leh mahni kea ding thei chinte'n mawh an phurh thu a sawi.

Lalduhoma sawi danin, kum 30 zet chhung mi pahnih ngaihdanin Mizo mipuite hruai an ni tawh. Pakhatin a ṭawng a ûmpha lo a, pakhatin ûm pawh tum loin a thlir mai mai thung.

Inthlan dawn apiangin sorkar ding lai paih duhna boruak a lo lian ṭhin a, term hnih an hman hnu phei chuan paihthlak zel an ni. Party worker ho, an zarzo ṭhin leh zar zo leh tumte chu thâwm tina tham zet la nei ṭhin mah se, an ropui lai ber, an tam lai ber leh an sorkar lai ngeiin an tla tho tho ṭhin.

Sorkar ding lai chu mipuiin an nin tawh chuan a paih lam chu an thiam tih sawiin Duhoma chuan, "Paihthlak loh kan hlauh lutukna lamah a paihthla theitu tur ringawt kan dap a, kan hnâwl tawh hnute pawh ni se, a thlak nan kan hmang duh leh zel a, eng nge kan vote chhuah dawn tih lam kan ngaihtuah chang tawh ṭhin lo," a ti.

ZNP President chuan, Congress leh MNF rorel chhungin kan la hriat ngai loh politics bawlhhlawh a thleng tam hle nia sawiin, "Lim inhâlsak tichhuaktu an ni. Tunah chuan bomb puakte pawh ngaiah kan neih lek lek ta mai," a ti a; MNF leh Congress party chuan an rilru leh an sorkar kalphung pawh a thuhmun reng niin a sawi.

Lalduhoma chuan, MNF-te'n zu zawrh duh loh avangin kawng an zawh tih sawiin, "Anni pawhin an sorkar lai khan an zuar ve tho. Congress-in NIAS-a zirlaite a tirh thuah an dem em em a, MNF sorkar pawhin Gulshan Sharma nena inthurualin zirlai za tél a lo tir thlawn ve tawh tho a ni," a ti.

Mipuite mahni mimal hamṭhatna tur ngaihtuah miah lo a, tlàwmna nun nena rawngbawlpuiah a sáwm a ni.