UP state-a sakhaw hmuna naupang chhanchhuah zingah Mizo an tel lo

Tun hnai khan Uttar Pradesh-a Muzaffarnagar-a sakhaw hmun pakhat aṭangin naupang kum tling lo 10 chhan chhuah an ni a; chu'ng zingah chuan Mizo naupang paruk an tel vea sawi a ni. Mizoram police hotute erawh chuan, Mizo naupang nia sawite chu Mizo an ni lo a, Mizorama awm Chakma naupangte an nih thu an sawi.

Indian Express-in a tarlan dan chuan, tun hnai khan Muzaffarnagar-a sakhaw hmun (ashram) pakhatah naupang kum 10-14 inkar 10 chhan chhuah an ni a, Mizoram leh Tripura aṭanga lakte niin, sakhaw puithiamte'n an pawngsual ngei tih medical test aṭangin finfiah a ni. He thil thleng avang hian police-ah FIR thehluh a ni a, sakhaw hmuna hotu (puithiam) chu police-in an man.

Sakhaw hmun pakhatah naupang an awm thu leh thil dik lo a awma hriat a nih thu Muzaffarnagar-a Childline-in (Childline hi Ministry of Child and Welfare Development hnuaia din a ni)  an dawng a, anni'n police punin, ashram chu an endik ta a ni. Naupangte chu kum thum chuang awm tawhte an nih thu Indian Express chuan a tarlang.

Mizoram police hotute hnen aṭanga thu dawn danin, thil thleng hi Muzaffarnagar SP-in Mizoram DGP hnenah ziakin a thlen a, Mizoram police hotute'n hma an la nghal a, nimin khan police hotute an inhmu khawm a ni.

Police hotute chuan, naupang 10-te chu Mizoram mi paruk leh Tripura mi pali an nih thu sawiin, "Mizoram mi nia sawite hi Mizo chu an nih loh hmel a, Chakma naupang an nih hmel. Mizoram mi erawh an nih hmel a, an address tak a chiang lo nãin, ṭhenkhat chu Marpara vel báwra mite an niin a lang," a ti.

Ashram hi Hindu-te'n sakhaw thila an ṭawngṭaina, sakhaw thil leh thlarau lam thil an zirna leh yoga an tih ṭhinna hmun a nia thu dawn a ni.