Aizawlah Aizawl Book Fair ṭan a ni

New Delhi-a National Book Trust, Mizoram University-a Mizo depart­ment leh Mizoram sor­kara School Education department-te chuan nimin aṭang khan Mizo High School Field, Zarkawtah Aizawl Book Fair - cum - Literary Festival an buatsaih ṭan a; Governor Lt.Gen. Nirbhay Sharma-a'n a hawng.

Governor chuan, mi­puite rilru sûkthlêk leh ram hmasawnna atan lehkha chhiar tam a pawimawh tih sawiin, Aizawla Book Fair leh Literary Festival changtlung tak buatsaih a ni chu lawmawm a tih thu a sawi a, "Thu leh hla hi hnam ziaráng leh chanchin pho chhuahna a nih angin, Mizo thuziak mite tana hun ṭha siam a ni leh state páwn thlenga an hming a lang thei tur hi a vanneihthlak hle a ni," a ti.

Hnam hrang hrangte inkara inpawhna leh inhriatthiamna ṭha a awm theih nan an thu leh hlate ṭawng danga lehlin a pawimawh tih sawiin Larsap chuan, "Mizote kutchhuak thu leh hlate pawh Sap ṭawng leh Hindi-in a tam thei ang ber lehlin ni se. Ṭawng danga ziah lehkhabute pawh Mizo ṭawnga lehlin a, Mizo mipuite'n an chhiar ve theihna turin ṭan lak a pawimawh," a ti a; e-learning leh e-library lamah pawh Mizote kutchhuak dah ni se a duh thu a sawi.

Lt.Gen. Nirbhay Sharma hian MZU Mizo department-a HoD Prof. Laltluangliana Khiangte lehkhabu, ‘Folktales of Mizoram’ tih a tlangzarh a; khualzahawm Vanlalawmpuii Chawngthu, MLA-in Prof. Laltluangliana Khiangte lehkhabu dang, ‘Zonu Cheipar-I : H Lalngurliani leh a kutchhuak’ tih a tlangzarh thung.

Vanlalawmpuii Chawngthu chuan, social media a chak tak karah Mizo te, a bikin ṭhalaite chu lehkhabu chhiar lamah ṭan la a, lehkhabu hlutna hre thar leh tur leh, Mizo kutchhuak thu leh hla ngaihsan nachang hre turin mipuite a chah a; Mizo nula leh tlangvalte chu Mizo ngei nupui/pasala nei tura chahin, "Mizote hi khawvelah kan hmelṭha tawk a ni," a ti.

Aizawl Book Fair hawnna inkhawmah hian Prof. Laltluang­liana Khiangte, K Lal­thawmmawia, School Education director leh National Book Trust assistant director Mayank Surrolia ten thu an sawi bawk.

Aizawl Book Fair cum Literary Festival hian March 11 thleng a awh dawn a; stall 50 siam niin, Mizoram leh India ram hmun danga lehkhabu dawr hrang hrang 35-te'n dawr an hawng.

Vawiin leh naktukah Meet The Author, Poets Meet leh Poets Ensemble-a hun hman a ni dawn a; Ninganiah quiz competition neih a ni ang a, Zirtawpniah Symposium on Mizo Language hun hman a ni ang.