Khamrang leh Theiva khuaa lirthei chetsualnaah mi 3 an thi

Nimin khan Theiva khaw dai, Siaha district-ah leh Khamrangah lir­theia chetsualna a thleng a; mi pathum an thih bakah, mi paruk an hliam.

Siaha aṭanga thu dawn danin, nimin zing lam khan Zawngling khuaa ECM khawmpuia kalte chuanna Bolero leh i10 car chu Theiva khaw daiah an chesual a, Bolero-a chuang dri­ver leh motor neitu Zoramthanga (44) leh C Rimawia (55), Zero khua, Siaha district ve vete a hmunah an thi nghal.

Bolero leh i10 car-te hi an inzui a, Bolero hi tlan liam hmasain, i10 car hi a tlan liam ve zui nghal a ni. i10 car-a chuang leh a neitu Priscila chu helicopter hmanga Aizawl panpui niin, Bolero-a chuang pakhat chu Lunglei lamah thawn a ni a, hliam dang pathum chu Lawngtlaia ECM dam­dawi-inah dah an ni.

Nimin chawhma dar 10:30 vel khan Kham­ranga NH-54 kawngpuiah tanker AS-11 AC- 0582 Aizawl lam pana tlan leh tipper MZ-01 M-2433 an insû a, tipper khalhtu VL Ruatpuia (32), Bawng­kawn a hmunah a thi. Chetsualna hmun hi Kawnpui police-te'n an pan nghal a, VL Ruatpuia ruang hi Kawnpui PHC-ah postmortem a ni.

Tanker khalhtu hnam dang chu a hliam a nat avangin Aizawl panpui nghal a ni a; tanker-in tuialhthei a phurh chu a buak nasat avangin vên nghal a ni bawk.