Kolkata Mizo Students' press release A dik lo niin NIAS zirlaite'n an tarlang

Nalanda Institute of Advance Studies (NIAS), Kolkata-a zirlai tirh thlak ṭhenkhatte chuan thuchhuah siamin, an zirna kaihhnawiha sorkara zangnadawmna an dil chu sorkarin a buaipui mek nia an hriat avangin a fel thuai an beisei thu an tarlang. Hetih lai hian, NIAS chungchanga Kolkata Mizo Students' (KMS) thuchhuah chu a dik lo tih an puang.

NIAS zirlaite chuan, an harsatnaah ṭanpui tura an ngenna MZP leh MSU-te'n an tihhlawhtlin theih loh hnua Aizawl City College Joint Students Union (ACCJSU)-in thâ leh zung sênga hma an lakpuinaah lawmthu an sawi a; an zirlaipui C Laltlanmawia hnenah sorkarin medical bill Rs. 1,21,156 a pe ta chu an lawmpui thu sawiin, "Compensation kan dil mek pawh sorkar file-ah a kal mek niin kan hria a, rei lo têah a fel kan beisei," an ti.

An thlavâng hauh tura an beisei, KMS hmalak dan chu mak an tih thu sawiin, "KMS leh MSU hruaitu ṭhenkhatte'n thu belhchian dâwl lo hmangin min bei zui ta zawk a ni," an ti. KMS-in thuchhuah an neih dawn lai velin MSU hruaitu pahnih chu Kolkata-ah an zin thla nia sawiin, KMS thuchhuah leh MSU hruaitu pahnihte zirchianna an hmuh ve ve hnuah an ngaihṭhat lohna dikzia an nemnghet tih an sawi.

KMS-in an thlavâng an hauh tura an ngaih laiin, February 21, 2017-a KMS thuchhuahah an beiseina a thlawn tih an sawi a, "An hnena ngenna kan thawnte khan inchhirin ban a chen ta zawk a. Thu dik tâwk lo leh belhchian dâwl lo an rawn chhuah ta zawk a ni," an ti.

NIAS zirlaite thuchhuah tarlan Ṭhenkhat
1. NIAS chu Soorya Institute of Management Studies kaltlangin Annamalai University-ah a affiliate tih kha thu dik lo a ni. NIAS hi direct/indirect-in Annamalai University-ah a in affiliate lo.
2. 'Annamalai University-a affiliation hi kum tin a renew ṭhin a, kum 2016-17 atan affiliation a renew bawk a ni,' tih hi dâwt chiang tak a ni. NIAS hian Annamalai University-ah vawi khat mah affiliation a la nei lo a, renew tur a awm lo hrim hrim. Khawi zirna-in mahin kum tin university affiliation an renew ngai lo.
3. 'Zirlaite first year an nih lai (2014)-in institution an panna tur bus pek an ni ṭhin a, kum 2015-a hostel thara an insawn hnu, IT training-a an kal zawhin zirlaite an tlem avangin bus hi pek an ni tawh lo a, bus fare erawh NIAS-in a tumsak' tih kha thu dik lo a ni. NIAS hotute thu chauh lain, zirlaite min zawt ve lo a; a tira vawi khat Rs. 10 ṭheuh bus fare min pek bak min pe leh lo.
4. NIAS hnena cheng nuaih 128.20 sorkarin hmanhmawh taka pek tlak chungchang sawifiahna NIAS hotupa Mainak Saha sawi an rawn chhuah tel hi thil mak tak a ni a, NIAS ni loin, a petu Mizoram sorkar sawifiah zawk tur a ni. KMS thuchhuahah, 'Course fee leh fee dangte instalment hnihah a pe tla vek a ni' tia an ziak hi thu dik lo a ni a, instalment hnih ni loin instalment thuma pek tlak a ni zawk. First instalment-ah Rs. 66,09,900, second instalment-ah Rs. 4,40,660 leh third instalment-ah Rs. 57,68,640.
5. NIAS aṭanga final warning hmuh leh buaina siam vanga ngaihdam dilna lehkha zirlaite'n an thehlut anga KMS-in an tarlan chungchangah, "Regular taka bus service tir turin kan ngen ṭhin a, min tihhlawhtlinsak theih loh avangin a huhoin a nawr nan class kan kal lo ṭhin a, class kal ṭha duh lo angin min chhuah zawk a ni. C Laltlanmawia chauh hi notice an pek a ni lo a, zirlai zawng zawng min pe a ni."
6. Buaina siam vanga ngaihdam dilna thehluh an sawi hi, current bill an bat nasat lutuk vanga rei tak Boys Hostel-ah current kan neih loh ṭhin vang te, hostel cook hlawh an pek theih loh vanga cook-te an tlanbo ṭhin vanga kan complaint ngun em avanga thleng a ni. Tihluihnain lehkhate hi anmahni inven nan min ziahtir zel zawk a, 'Vai ram chu ni lo se aw...' kan ti vawng vawng ṭhin.
7. Institution, hostel campus, gym & swimming pool thlalak February 17, 2017-a lak an sawi hi NIAS ta a ni lo a, building luahtu dangte ta a ni. Swimming pool-ah hian zirlai zinga hostel-a awm rei ber February 23, 2017 thlenga awmte pawh vawi khat mah an chêng lo a, a chhan chu NIAS ta a nih loh vanga a ni a, mimal ta, terminator gym a ni.
8. February 28 khan MSU hruaitu pahnih - assistant general secretary Vanlalliana Khiangte leh MSU magazine Kulva editor K Lalnunzama ten 'NIAS Kolkata zirchianna' tih chu an tichhuak a. March 6, 2017 hian MSU Gen. Hqrs. office-ah kan zawt chiang a, "MSU-in a hriatpui lo, anmahni mimal tih a ni," an lo ti.
9. NIAS hostel an sawn chhan hi zirlai zu ruite'n buaina an siam vanga a bul hnaia chengte'n complaint an siam vang ni loin, in luah man an pek theih loh vang zawk a ni.
10. 'Kum 2015-a KMS Fresher Social-ah Education minister H Rohluna khuallian a ni a, NIAS-a Mizo zirlai ṭhenkhatte hi buaina chawk chhuaktu an ni tih hriat a ni bawk,' an tih hi dâwt a ni. Kum 2015-a KMS-in Fresher Social kan hmannaa khuallian chu mining engineer Hriata Chhangte a ni. Minister hmingchhál meuha dâwt chiang tak an sawi hi a thinrimthlak hlein kan ring.
11. MSU hruaitute zu kal laia hostel phuahchawpa la awmte khu exam ngei tum an ni a, mahse, NIAS hi a lem a ni tih anmahni leh an nu leh pate'n an hriat chian tâk vanga NIAS chhuahsan duh an ni. Compensation duh vanga bànsan anga an chhuah hi ná kan tihpui hle.
12. C Laltlanmawia damlohna hi khaw lum bawl, dettol hnawih vanga na zual anga dâwt huai taka an ziak hi mak kan ti. A natna hi Tanaea Corporis Necrotising Fascitis' a ni a; Mizo mipui an bum duh a nih pawhin, a aia âwihawm deuha phuah zawk âwm a ni.
13. NIAS chungchang hi MZP a ni emaw, MSU a ni emaw, KMS a ni emaw, Executive Meeting-a sawiho an ngam tlat lo zel hian a tuartu nih chuan ngaih a ti ṭha thei thlawt lo.
14. NIAS hi Govt. of West Bengal hnuaiah zirna in lem (fake institution - AICTE pawmpui loh) a ni tih kan sawi nawn leh. (Hei hi All India Council for Technical Education (AICTE) website-ah chiang takin serial no. 331-naah a lang. http://www.aicte-india.org/das...
15. Hillsgate chanchinbu Editor-in NIAS-in affiliation Annamalai University-ah a neih leh neih loh a zawhna chu Annamalai University director (Academic Affairs) Dr K Manivannan-in 'There is no such affiliation with that institute' tiin a lo chhang.