Sa man bithliah zâwm lo hmu chhuak

Serchhipa Legal Metrology, Consumer Union, YMA Sub-Headquarters leh MJA-te chuan July 11, Inrinni zing khan Serchhip bazara sa an hralh dan an endik a; bawng sa zuar mi pahnih leh vawk sa rêp zuar mi pangate’n sa rate bituk angin an zuar lo tih an hmu chhuak.

Serchhipa hman tur sa chi hrang hrang hralhna man tur hi July 1, 2020 khan district bawrhsap hoin bithliah a ni. Sa man an bithliah dan chu - kg. khat zelah - bawng sa a tî leh a kawchhung Rs. 500, a ti leh a ruh inpawlh Rs. 450, a thin hlang Rs. 600, vawk sa Rs. 350, ar sa Rs. 300, vawk sa rêp (gram 750) Rs. 350 a ni.

Serchhipa sorkar hotute leh pawl hrang hrang aiawhte’n bazar an endik lai hian bawng sa tî Rs. 600 leh a sa dang Rs. 500-in an zuar a, vawk sa rêp túl khat (gram 500 vel) Rs. 350-in an zuar a, vawk sa hring erawh a awm lo. Ar sa chu Serchhip páwn lam aṭanga lak a nih avang leh DC hnenah hriatthiam an dil angin Rs. 350-in an zuar a, vawiin aṭang erawh chuan Rs. 300-in an zuar dawn niin an sawi.

Sa rate bithliah zâwm loa sa zuarte chu Legal Metrology-in dan angin an bawhzui a, sa rate chungchanga thupek chhuahtu DC hnenah thlenin, an phu tâwk hremna pe turin an ngen a ni.