Assembly Session neih turah Budget puitling pharh tum a ni

March 14, 2017 aṭanga Mizoram Assembly Budget Session neih turah kum 2017-18 atana Mizoram budget puitling pharh tura inbuatsaih a ni a, ruahmanna kalpui mek a ni.

Vanglaini palai zawhna chhanga Finance secretary Lalropara sawi danin, budget puitling pharh tur hian ruahmanna peih thawkhat a ni tawh. Bussiness Advisory Committee-in ruahmanna a siam ang chuan, budget hi March 16-ah Finance Minister-in a pharh ang.

Finance Secretary sawi danin, kumin aṭang hian a ṭum khatna atan budget-ah non-plan leh plan fund a hrana siam a ni tawh dawn lo a, hmun khatah dah a ni dawn. Centrally sponsored scheme leh budget páwn aṭanga sum hmuhna ṭhin dang erawh a hranpaa dah a ni ang.

Tun hmaa Planning Commi­ssion hotute kaihhruainaa plan discussion neih ṭhin chu a awm tawh lo a, sorkar laipuiin Finance Commission ruahmanna angin thla tin state-te tan a pe chhuak mai ṭhin. Sumte hi sorkar inrêlbâwlna atana hman tur (revenue expenditure) leh hmasawnna ruhrel dinna tur (capital expenditure)-a ṭhen a ni.

Tun hma chuan Planning Commission-in state sorkarte chu sum thawk chhuak turin a beisei ve ṭhin a, an beisei ang an thawh chhuah loh chuan sum ruahman ang an pe thei ṭhin lo. Kalphung tharah hi chuan budget-a awm ang chu hmu theih tura ngaih a ni. Sum hmuhte chu non-plan leh plan fund-a ṭhen a nih tawh loh avangin, state sorkar thuneihnaah a innghat thui hle.

Hetih lai hian, Finance Commi­ssion rawtna ang diak diakin sorkar laipuiin sum a pe chhuak ngai lo. Finance Commission-in thla 12 chhung atana sum pek tura a ruahman chu sorkar laipuiin thla 14-ah a ṭhen a, hei hi chhiah an hmuh tur ang an hmuh loh palha harsatna a thlen lohna atana tih a ni. Sum an hmuh ṭhat chuan Finance Commission ruahman ang zawng zawng sum pek chhuah a ni tho.

Budget kalphung thar hman a nih dawn avangin buaithlakna chin a awm tih sawiin Lalropara chuan, "Vawi khat budget kalphung thar anga kan kal tawh chuan a awlsam tawh ang. Tunah hian office hour piah lamah pawh budget pharh tur buaipui hian hna kan thawk char char a ni," a ti.