Mizo IAS hmasa SR Vala vui a ni

Mizo zinga IAS-a lut hmasate zinga mi, SR Vala (85) f/o Lalduhthlana, Mission Veng chu March 6, 2017 zan dar 11:05 khan a thi a, nimin khan an inah Rev. F Lalrinnunga'n a vui.

SR Vala hi January 9, 1932-ah Bawngchawm khuaah a piang a, naupang tê a nih laiin Sumsuihah an pem. April 17, 1956-ah Vanlalchhungi nen an innei a, fapa pakhat leh fanu pali an nei.

A fate zingah Lalduhthlana Ralte, IFS (Rtd.), tuna Chief Information Commi­ssioner leh Dr Enghming­liani Ralte, eye specialist-te hi a lar zualte an ni.

Kum 1946-ah pawl 6 exam-ah Mizoram pumah pakhatna a ni a, kum 1952-ah private-in matric a exam a, Mizoram aṭanga first division-a pass mi pathum zingah a tel.

Kum 1955-ah Intermediate of Arts (tuna pawl 12) private-a exam-in a pass a, kum 1958-ah private bawkin Shillong-ah B.A exam-in, distinction-ah a pass leh a, Gauhati University-ah pathumna a ni. Lehkha a zir lai hian hna hrang hrang a thawk.

Assam sorkara district publicity officer hna a thawh laiin kum 1961-ah IAS-ah a tling a, Orissa cadre-ah dah a ni. Kum 1972-a Mizoram UT a nih khan deputation-in Mizoram sorkarah secretary hna a thawk a; kum 1992-ah a pension. A pension hnuah Mizoram Public Service Commission din tharah chairman hna a thawk leh a ni.

SR Vala hian chuap cancer a nei tih kum 2000-ah hmuh a ni a, a hnuah parkinson’s disease-in a tlakbuak leh a ni.