Agro & Allied Products neitu Zonuam police-te'n an man
Mizoram Agro & Allied Products, Luangmual neitu Solomon Vala s/o Lalhmingthanga laka MZP-in FIR an thehluh hnuah, police-te'n Lalhmingthanga chu nimin khan an man.
MZP hian Mizoram Agro & Allied Products-in zirna a kalpui danah thil dik lo a awm nia hriain October 4, 2016 khan Zonuam Police Outpost-ah chhuichiang tura ngenna FIR an thehlut a; police hotute leh Mizoram Agro & Allied Products hotute chu indawrin, zirlaite sum senso zawng zawng chu kum 2016 ral hmaa pe kîr leh vek tura tih an ni.
Mizoram Agro & Allied Products-in sum a pek lêt tâk loh avangin MZP chuan an general secretary L Ramdinliana Renthlei hmingin March 2, 2017 khan Zonuam Police Outpost-ah FIR an thehluh nawn leh a; police-te chuan zirna-in neitu Solomon Vala chu nimin khan an man ta a ni.
Solomon Vala hi nimin khan Court-ah hruai nghal a ni a, Court chuan police-in an dil angin darkar 24 chhung an kawl zui a phalsak.
MZP chuan, Mizoram Agro & Allied Products hian an zirlaite hnenah course fee lak loh an tiam chungin thla tin course fee an lak thu te, zirna a mumal loh thu te, course-a tel lo an zirpui ṭhin thu te, zirlai awm lo chungin (hming lemin) sorkarah hamṭhatna an dil ṭhin thu te, zirlaite chu certificate leh marksheet lem an siamsak ṭhin thute an tarlang.
MZP chuan, Mizorama zirlaite hmakhua tichhe thei tur leh zirlaite tana harsatna awm thei tura zirna in lem ang chi chu din lo turin mi tin an ngen a; zirna in lem a awm loh nan registration pek kawngah fimkhur turin sorkar thuneitute an ngen bawk.