Zoramthanga lehkhabu ziah tlangzarh

MNF president leh chief minister hlui Zoramthanga lehkhabu ziah, 'Mizo Hnam Move­ment History (A History of Mizo Nationalism Movement)' tih chu nimin khan Vanapa Hall-ah MZU vice chancellor hlui Prof. R Lalthantluanga'n a tlangzarh.

Prof. R Lalthantluanga chuan, lehkhabu tlang­zarh tâk chuan ṭangkaina tam tak a nei dawn tih sawiin, "A tir aṭanga he movement-a telin lehkhabu a ziak hi a lawmawm hle. Mihring ngaihdan a inang vek thei lo a, ngaihdan inang lo a awm pawhin sawi chhuah a thiang vek. Mimal leh party inbeihna atana hman erawh thil ṭha a ni lo ang," a ti.

Lehkhabu ziaktu Zo­ramthanga chuan, college zirlaite'n an kawm ṭhin thu sawiin, "Mizoram buaina leh inremna thuthlungte history subject anga ziak a la awm mumal loh avang leh zirlaite'n min biakràwn fo avangin, hun rei lo te chhunga thil engkim sawi hman a ni ṭhin lo," a ti a; history lama tuite mamawhnain lekhabu a piantir thu a sawi.

Lehkhabu tlangzarh inkhawm hi MNF trea­surer Vanlalzawma'n a kaihruai a, Doordarshan Kendra news editor J Mal­sawmzuala'n lehkha­bu dinhmun tlangpui a sawi a; MNF senior vice president Tawnluia leh Vanglaini editor K Sapdanga ten thu an sawi bawk.