KHAWTHLIR

Thisen pe
Lungleng Branch KṬP chuan an branch diamond jubilee pualin nimin khan an Kohhran Hall-ah thisen pek an huaihawt a, Synod Hospital tan mipa 16 leh hmeichhia pakhatin thisen unit 17 an pe.

Zawhna lut zat
March 14, 2017-a Mizoram Legislative Assembly budget session ṭan tur atan nimin thleng khan House-a chhan chi zawhna (starred question) 260, ziaka chhan chi zawhna (unstarred question) 60, private resolution 48 leh sorkar lehkha pawimawh House-a pharh tur 10 a lut tawh.

Wheelchair pe
Serchhipa RMSA pisa chuan nimin khan zirlai, pianphunga rualbanlo Zosangliani, Thenzawla pawl 9 zirlai hnenah wheelchair an hlan. Ser-chhip RMSA hian zirlai rualbanlo mi 75 chu an mamawh dan azirin wheelchair, tarmit leh bengdárte an pe tawh a ni.

Hmunphiah lei chawlhsan
MAHFED-in February 6, 2017 aṭanga Vairengte, Saipum leh Zemabawka hmunphiah thar chhuah an lei chu March 6 aṭang khan an chawlhsan lailâwk. MAHFED manager Zohming­thanga sawi danin, hmun pathumah hmunphiah lei chhunzawm tawh rih lo mah se, nimin thleng khan Vaitinah chuan an la lei chhunzawm a, kg. khat Rs. 65-in an lei a ni.

NLUP sem
AH&Vety department chuan, Lawngtlai East leh West bial chhunga NLUP hnuaia ar vulh thlangtu mi 106 hnenah ar vulh ṭanpuina an sem. Mi 106 hnenah hian ar notê 100, a chaw ip paruk, ar chaw pekna pahnih, tui dahna litre 300 dawng leh damdawi chi hrang hrang bûr ruk ṭheuh pek an ni.

V/C training
SIRDPR chuan, nimin khan an conference hall-ah Rasthriya Gram Swaraj Abhiyan scheme hnuaiah Aibawk RD block hnuaia village council member-te tan training an buatsaih a, tualchhung rorelna dik leh ṭha kenkawh theih dan tur an zirtir.