CSS Hindi zirtirtute chungchangah Sorkar laipui hotute kâwm kual
Chief Minister ruahmanna angin, parliamentary secretary Joseph Lalhimpuia, Central YMA, MZP, MSU leh Mizoram CSS Hindi Teachers Association (MCHTA) hruaitute chuan March 6, 2017 khan Mizorama CSS hnuaia Hindi zirtirtute chungchangah Human Resource Development (HRD) ministry hotute New Delhi-ah an hmu.
Centrally Sponsored Scheme (CSS) hnuaia Mizorama Hindi zirtirtu 1,300 velte chuan thla 10 hlawh an la thei tawh lo a, February 28, 2017 khan an thawh hun (contract) a tàwp bawk.
An hlawh tur HRD-in a pek chhuah theih nan leh an thawh chhunzawm theih dan tur sawipuiin Joseph Lalhimpuia hoin CYMA assistant secretary R Lalngheta, MZP president Lalsangzuala Ngente, MSU president RB Lalmalsawma leh MCHTA hruaitute'n HRD hotute an dawr a ni.
HRD ministry hotute chuan, CSS Hindi zirtirtute hlawh sorkar laipuiin thla 10 a batsak chu a rang lama pek thuai an tum thu an lo hrilh a; Mizoramin Hindi zirna kawnga a hmasawn dan leh a mamawhte zir chiangtu tur rawn tirhte'n ṭul leh mamawh an report dan azirin thla thum hnuah Hindi zirtirtute dinhmun tur chu tihchian a nih tur thu an lo hrilh bawk.
HRD hotute chuan, CSS language teacher tan MHRD budget-ah kum 2017-18 atan cheng vbc. 125 dah a nih thu an sawi a ni.
Parliamentary Secretary leh NGO hruaitute hian minister of state for Home Kiren Rijiju pawh hmuin, CSS Hindi zirtirtute chungchanga an thu kente chu bawhzuipui turin an ngen a; Kiren Rijiju chuan, Mizote'n Hindi an thiam ngei a duhsak thu leh theihtawp chhuaha a lo bawhzuipui tur thu a lo hrilh.
India President leh Prime Minister hnenah ngenna an thehlut bawk a; North East Students Organisation (NESO)-in HRD Minister hnenah ziakin an ngenpui bawk. Sorkar laipui hotute an hmuhnaah hian School Education department-a deputy director (Hindi) Lalchungnunga pawh a tel a ni.