Siaha-ah Lyuva Khutla hman a ni

Lyuva Khutla 2017 chu nimin khan Siaha District Playground-ah hman a ni a, Kût Pa N Chakhai, Siaha additional DC-in kût puanzar pawt pharhin a hawng.

N Chakhai chuan, kût chuan pi leh pute hun lai a hriat chhuahtir thu sawiin, "Mirethei leh mi awm theite pawhin he ni hi hlim leh inlungrual takin an hmang ṭhin a, hmeithai leh fahrate tan ni hlimawm ber a ni ṭhin. He kût hi Mara fate tan chhinchhiah tlak a ni a, hmasawnna chi khat a nih bakah, kut hian kan hnam min tihchiang a, Mara fate min hûi khawmtu a ni," a ti.

Lyuva Khutla hman­naah hian Mara Thyutlia Py (MTP) branch hrang hrangte'n hnam làm leh incheina an entir bakah, YMA Siaha Group leh YLA sub-hqrs., Siaha ten hnam làm an entir a ni.