Mizoramin rorelna buai tak sorkar A hrawn mek - MPC President

MPC president Lalhmangaiha Sailo chuan, tun hnai thla thum chhunga Mizoram dinhmun thlirin, rorelna buai tak sorkar Mizoramin a hrawn mek niin a sawi.

Nimina MPC party pisaa inkhawmah thu sawiin, Lalhmangaiha Sailo chuan, "Kumin 2017-a thla thum kan hman chhung hian thu thar a tam hle a, thu lawm­awm, mipuiin an ngaih­thlak châk zawng a tlem a, ram kan inkaihhruai dan kan thlir chuan rorelna buai tak sorkar kan hrawn mek a ni," a ti.

Congress sorkarah kum 2017 tir aṭangin sum lama harsatna a thleng nia sawiin Lalhmangaiha chuan, "Department hrang hranga thawk leh mipui nun leh khawsak tihhrehawmna leh tibei­dawng zawnga sorkar chetna te, SSA-a thawk te, Hindi zirtirtute hlawh pek theih loh leh ngaihsak ṭhat duh lohte a awm," a ti a; chaw ngheia sorkar nawr a ngai chu mipuiin Congress party-a vote an pek tawh lohna tur chhan tur a nih thu a sawi.

MPC President chuan, Congress sorkar­ah depart­ment-a lirthei siam­na man cheng vaibelchhe tam tak ba a awm a, bill dang tam tak bá leh TA/DA pek theih a nih loh thu sawiin, "Economy a pawt hniam hle a, hetiang kara Chapchar Kût atana budget tam tak sen a ni hi a inhmeh lo hle. Congress sorkar kal dan hi sorkar felfai kalphung a ni hauh lo tih mipuiin kan chiang tawh hle a ni," a ti.

Lalhmangaiha Sailo chuan, MPC party chuan good governance din chu an thupui ber a ni tih sawiin, chumi tihlawhtling tur chuan Zoram mipuite thawhhopuiah a sáwm a ni.