Model village hmasawn dan tur sawiho

Champhai South bialtu MLA TJ Lalnuntluanga, minister of state-in model village atana a thlan Tlangsam tihhmasawn dan tur ngaihvenin tun hnai khan Champhai DC Maria CT Zuali leh sorkar official-te'n Tlangsam tlawhin, khawtlang hruaitute nen hmalak dan tur an sawiho.

Champhai Bawrhsap chuan, Covid-19 léng leh district chhunga lirnghing ṭhin avangin ruahmanna fel neih a har thu sawiin, "Model nih avangin a tìr aṭangin engkim a fel nghal vek bik lo. Model hlawhtling ni turte'n kawng engkima training an la hmasa ṭhin angin, model village ni turin theihtawp chhuaha inzir a ngai a, khaw dangte tana entawn tham ni tur khawpa lung­rual taka thawhho a ṭul a ni," a ti.

Tlangsam chu khaw mawi leh nalh a nih thu sawiin Champhai DC chuan, "Khaw mawi leh nalh, in leh lo ṭha ringawt hi hmasawnna a ni lo a, in leh lo ṭha neiin in­fras­truc­ture ṭha tak tak nei mah ila, eizawnna tur ṭha kan neih si loh chuan hmasawnna a tling lo a ni," a ti a; Tlangsam khaw mipui 95% vel kut hnathawka eizawng an nih avangin, agriculture lamah theih­tawp chhuah a nih tur thu a sawi.

Maria CT Zuali chuan, kawng engkimah sorkara innghah bur bànsan a ṭul thu sawiin, "Sorkar thil chu mimalin kan ta anga en a ngai. Hmasawnna kawnga pawimawh ber - mimal hmasawnna ngai pawimawh a ṭul a ni," a ti.

Champhai DRDA project director R Lalnghakliana chuan, Tlangsam mipui chu a ṭha lama entawntlak ni tura an bialtu MLA-in model village-a a thlan anga theihtawp chhuah turin a ngen a, "Sorkar aṭanga hmasawnna kal ringawta innghah loh tur," a ti a; Champhai South constituency huam chhunga khaw entawntlak ber ni tura theihtawp chhuah turin a fuih.

Tlangsam VC president HL Malsawma chuan, model village-a thlangtu bialtu MLA TJ Lalnun­tluanga chungah an khawtlang an lawm thu a sawi a; model village a taka kalpui a nih theihna tura department hrang hrang hotute'n a hmun ngeia tlawha an zirtir avangin lawmthu a hrilh. Tlangsam khuaah hian in 537 a awm a, mi 2,137 an chêng mek a ni.