Aizawlah damdawi zuarte inhmukhawm

India rama damdawi zuarte intêlkhawmna, All India Organisation of Chemists and Druggists (AIOCD), North East Zone chuan nimin khan Aijal Club-ah meeting an nei a; India hmarchhak state hrang hrang aṭangin palai ṭhahnem tak an tel.

Meeting-ah hian, tunlaia damdawi ruih theih leh hman khawloh theihte a hluar thu te, damdawi ruih theih thehdarhtu mi ṭhenkhatte vangin damdawi zuar mi dik leh rinawm tam takin dem an hlawh pha thute sawi lan a ni a; damdawi ruih theih thehdarh chingte chu sorkarin dîm lo se an duh thu sawiin, an drug licence pawh tihtawpsak mai se an duh thu an tarlang.

India hmarchhak biaka damdawi zuarte'n damdawi quality ṭha an neih theih nana company rintlak leh rinawmte chauh dawr ṭha an tih thu sawiin, kawng ṭhat tawk loh vanga bungraw phurh kawnga harsatna an tawhte sut kian dan tur an sawiho a; an harsatna lian ber - damdawi dawra pharmacist awm tur rawih man sang ta lutuk leh dawrah pawh ṭhutchilh tak tak si lote thla tin sum tam tak pek ngai ziah tho site chu ennawn ṭha an tih thu an tarlang bawk.