Lal Thanzara'n Lunglei Civil Hospital-ah ward thar hawng

National Health Mission hnuaia Lunglei Civil Hospital-a din thar, Geriatric (Elderly) Ward leh Audiometry Unit chu nimin khan Health minister Lal Thanzara'n a hawng.

Lal Thanzara chuan, Mizorama elderly ward hmasa ber Lunglei Civil Hospital-a hawn a ni chu lawmawm a tih thu sawiin, "Ram changkang apiangin hriselna an ngai pawimawh ṭhin. Thil dangah hma sawn mah ila, ram mipuite kan hrisel loh chuan awmzia thui tak a nei dawn lo," a ti.

Doctor indaih lohna chungchang sawiin Health Minister chuan, "Doctor nei renga pe duh lo kan ni lo. Doctor indaih lohna a nasat em avangin kan mamawhna hre reng chungin kan indahsak zung zung thei lo," a ti a; harsatna an tawh chu mipui leh pawl ang pawhin hriatthiampui se a duh thu a sawi.

Lunglei HPC vice chairman S Laldingliana, MLA pawhin thu sawiin, "Mipuite hman ṭangkai tura Lunglei Civil Hos­pital-a Geriatric Ward leh Audiometry Unit hawn a ni hi a lawmawm hle. Health Minister leh department hmalakna a fakawm a, Lunglei tan thil tam tak min tihsak a, Lunglei mipuite hi vui turah ka indah lo a, lawmthu sawia lawm nacháng kan hriat a ngai a ni," a ti.

Inkhawmah hian NCD nodal officer Dr Eric Zomawia'n Mizoram leh Lunglei district tana NCD hmalakna hrang hrangte a tarlang.