PWD CE-in KMMTTP a tlawh

PWD chief engi­neer (Highways) K Lal­sawmvela chuan, Thawhṭanni khan Kaladan Multi Modal Transit Transport Project (KMMTTP) kawng laih chu a tlawh a, hna thawh dan a enfiah.

PWD CE chuan, kawng laih hna thawktu (con­tractor)-te ko khawm­in, hna chak zawka thawk tur leh hun tiam chhung ngeia zawh hman tum turin a chah a, "Kawng siam hna hi fûrpuia thawh chi a nih loh avangin ṭhál lai chuan inthlahdah hauh loa thawh tur a ni," a ti a; hna thawktute'n harsatna an tawh ṭhin hrang hrang an sawite chu a chinfel dan tur a sawipui nghal.

KMMTTP kawng laih mek hi km. 89-a thui niin, km. 4 vel laih ngai a la awm a, chu'ng zinga hmun ṭhenkhat chu zangnadawmna chungchanga buaina awm vanga laih theih a la ni lo. Laih tawh chin tam tak chu a nih dan tur taka peih a ni tawh a, hmun ṭhenkhatah chuan blacktopping hna thawh mek a ni.

Kawng siam hna hi hmun thumah ṭhen niin, contractor pahnih - RDS Project Ltd. leh ARSS Infrastructure Projects Ltd. ten an thawk a, 64% thawh zawh a ni tawh. Ruahman dan chuan, kawng laih hna chu December 2018-a zawh tur a ni a, lei (bridge) lian zual pariat dawh zawh hun tur erawh hriat theih a la ni lo.