MZP-in Mamit College an khâr

MZP headquarters, Mamit chuan Mamit College aṭanga thlaktu awm loa assistant pro­fessor Lalrinchhana, Educa­tion department sawn chhuah sût tura an ngennain awmzia a neih loh avangin nimin aṭang khan tiamchin awm loin Mamit College-a kal turte an dang.

Mamit College an kharna hun­ah hian Mamit MZP president Lalropuia chuan, "Sorkar thunei­tute'n kan ngenna tlawm tak min tihhlawhtlinsak theih loh vanga Mamit College khâr a ngai hi hre­awm kan tiin pawi kan ti hle a, mahse, kan dikna leh kan ta tur mi dang hnenah pek a nih loh nan hreh tak chungin kan khâr a ni," a ti.

Mamit College-in nasa taka hma a sawn laia a hmasawnna tur dal zawnga thil a thleng chu pawi an tih thu sawiin, Lalropuia chuan, "Thlaktu awm lo chuan kan lecturer neihte hi khawi hmunah mah sawn kan remti ngai dawn lo," a ti a; thlaktu awm loa Lalrinchhana Serchhip College-a transfer a ni chu Mizoram khawthlang lama zirlaite leh mipui hmuhsitnaa an ngaih thu a sawi.

Lalrinchhana transfer order siamtute'n bialtu MLA John Rotluangliana, Cabinet minister pawh an ráwn lo nia sawiin, Lalropuia chuan, "Transfer order hi sût a nih hma chuan Mamit College khâr a ni dawn a, a ṭul ang zelin kan ngenna tihhlawhtlin a nih hma chuan hma kan la zel ang," a ti.

Mamit MZP President chuan, Mamit College English department-a assistant professor dang, Zosangliana Zuala, tun thlenga J Thankima College, Aizawla dah (attached) a la ni reng pawh pawi an tih thu a sawi a; a rang thei ang bera a post Mamit College-a awmtir turin sorkar an phût tih a sawi bawk.

Mamit MZP hian Lalrin­chhana transfer order sût an phût tih lantir nan March 2, 2017 khan transfer order sopy an hâl tawh bawk a ni.