Court-in mi bail-a eizawng ṭhin thiam loh a chantir

Aizawl district-a Special Court (NDPS Act) chuan, mi bail-a eizawng ṭhin Mary Lallawmkimi (36) w/o Lalbiakngheta, Saron Veng, Aizawl chu March 7, 2017 khan a thubuaiah thiam loh chantirin hremna tur a tichhuak.

Excise & Narcotics department thuchhuah tarlan danin, Mary Lal­lawmkimi hian Seri­culture department-a LDC hna thawk nia insawiin, heroin gram 29 kawl vanga man leh thubuai nei mi pakhat chu March 16, 2015 khan bail amount Rs. 1,00,000 dahkhamin a bail a; mah se, a mi bail hi a tlanbo avang leh Court-a a hruai thlen theih loh avangin man a ni.

Mary Lallawmkimi hian a bail amount chu a pek theih loh avangin March 7, 2017 Special Court (NDPS Act) Judge chuan thiam loh chantirin, thla hnih chhung jail-a táng turin a hrem a ni.

Excise & Narcotics department thuchhuah chuan, tunlaiin ruih­hlo vanga dan kengkawh­tute'n an man tawh chu mi ṭhenkhatin sum tlem hlawh nan hmangin an bail ṭhin tih a tarlang a, "Misual hrem ngaite hrem theih loha tlanbo ta an tam em em a. Mi ṭhen­khat phei chuan sum tam tak dahkhamin an bail a, hremna nasa tak an tawrh phah ṭhin," a ti a; mi bail kawngah fimkhur turin mipui an ngen a ni.