Lunglei MUP-in khawmpui an hmang

Mizoram Upa Pawl (MUP) headquarters, Lunglei chuan nimin khan inkhawmpui an hmang a; khuallian, minister Lal Thanzara chuan, Mizoramin MUP a nei chu Mizote vanneihna a nih thu a sawi.

Lal Thanzara chuan, Mizo­ramin tlawmngai pawl ṭha tak tak - MUP, YMA leh MHIP-te chu sorkar finchhuahtu an nih thu sawiin, "Kum upate hi kan hnam rohlu leh ram leh hnam tizahawmtu in ni. Hnam changkang apiangin kum upate hi an ngaihluin an duat thiam ṭhin," a ti.

Mihring nih chhungin upat leh tarte ngaia neih mai theih a ni lo tih sawiin Thanzara chuan, "Kan nun a thil dang kan tawn ang bawkin, mahni inher rema awm dan turte zir ngaihna laite a awm ve fo," a ti a; khawvel chu upate tel loa a kal theih loh avangin ṭhangtharte'n upate an zah thiam a ngaih thu a sawi.

MUP general headquarters president RK Thanga pawhin thu sawiin, "Mizoram sorkarin upate min ngaihsak a, sorkar finchhuahnaahte min telh ve ṭhin avangin kan lawm hle. Upate hi mi dangte tan malsawmna nih ṭheuh i tum ang u," a ti.

Inkhawm hi Lunglei MUP president Sanghlira Colbert-in a kaihruai a, general secretary B Dangliana'n an dinhmun tlangpui a sawi. Lunglei MUP hnuaiah hian unit 133-ah member 10,014 an awm a, member zingah hian mi pakua chu kum 100 leh a chung lam an ni.