Vanglaini logo

International Women's Day hman a ni

Nimin, March 8 kha hmeichhiate ni, Inter­national Women's Day a ni a, Aizawl leh khaw dang ṭhenkhatah hman a ni.

International Women's Day hi All Mizoram Women Federation, Mizo­ram University-a Depart­ment of Public Adminis­tration hnuaia Women's Studies Centre leh Control Arms Foundation of India huaihawtin MZU Audi­torium-ah hman a ni a, minister of state C Ngunlian­chunga'n a hmanpui.

C Ngunlianchunga chuan, International Women's Day thupui chu 'Be bold for change' tih a nih angin, hmei­chhia­te'n danglam ngam nun an neih a ṭul tih a sawi a, "Rahbeh reng tur kan ni lo a, ka rilru put hmang kan thlak danglam a ngai tawh. Mipa tih theih chu ka ti ve thei a ni kan tih a hun tawh a; hmeichhe tana seat reservation-a innghat ngawt loin, kan thiamna leh theihnate phochhuah a hun tawh a ni," a ti.

All Mizoram Women Fede­ration president Dr Jane R Ralte sawi danin, kum 1908 khan New York, USA-ah hmeichhiate'n an hnathawhnaah mipate hlawh ang an lak ve phak loh vanga lungawi lohna lantirin bul an

ṭan a, a hnu kum 1909 February 28-ah National Womens Day tiin an hmang ṭan. Kum 2010-ah ram 17 aṭanga hmeichhia pawl 100 chuang hruaitute'n Copenhagen-ah hmeichhiate ni hman an rel a, kum 2011 aṭangin International Women's Day chu hman a ni ta a ni.

International Womens Day hi IASE-ah pawh hman a ni a, Mizoram State Women Commission chairperson Vanlalawmpuii Chawng­thu, MLA khuallian a ni.

Vanlalawmpuii Chawngthu chuan, Mizote hnama an chian a ngaih thu sawiin, "Mizo hnam thuama inbela lungawi mai loin, kan thinlunga Mizo a ngai a, kan hnampui Mizo ngei nupui/pasala kan neih zel a pawimawh. Kan hnam zahawm taka a din chhuah theihna turin hnam damg nupui/pasala nei lo a, keimahni Mizo hnam ngei kawppui atan neih a ṭul. Mizo nula/tlangvalte tluka hnam hmelṭha leh huaisen an awm chuang lo," a ti.

International Women's Day hi Lawngtlaiah pawh Lawngtlai District Legal Services Authority, Lai Women's Association (LWA) leh MHIP sub-headquarters, Lawngtlaite huaihawtin BNRGSK Hall-ah hman a ni a; inneih, inṭhen, rokhawm leh châwmna pek chungchang leh India ram dana hmeichhiate dikna chanvo hrang hrang sawiho a ni.