Lokayukta ṭha neih kan duh - L&J dept. Chairperson tura rawtna a lut nual

Law & Judicial (L&J) department-in Lokayukta chairperson leh member tur rawt theih hun a hawn chhungin mi 10 chuang rawtna a lut a, an mi rawtte zinga bio-data thil tel lote chu dil leh mek an ni.

Hetih lai hian, L&J department hotute chuan Lokayukta ṭha tak neih an duh avangin thil tih zung zung theih a nih loh thu Vanglaini an hrilh.

Vanglaini palai zawhna chhanga Law & Judicial secretary Marly Vankung-in a sawi danin, Lokayukta chariperson leh member tur rawtna hi email leh lehkha hmangin a lut a, mi 10 chuang rawt a ni.

Rawtna thehlut tam tak chuan an mi rawtte bio-data an ziah tel loh avangin an dil leh mek. Rawtna lut zinga bio-data tel lote chu Search Committee-in a ngaihtuah dawn lo.

Search Committee hi March 14, 2017-ah an ṭhukhawm leh dawn a, Selection Committee hnenah Lokayukta chair­person leh member tura rawt turte tihfel an tum dawn a ni. Mipui aṭanga rawtna lut bakah hian member tinte'n rawt an nei vek a, mipui leh member-te'n an mi rawtte chu an zir chiang ang a, chuta ṭang chuan Selection Committee-ah rawtna an thlen leh dawn a ni.

Selection Committee hnena mi an rawt zat tur hi bithliah a awm lo a, Search Committee-te hian rawtna lut hrang hrangte an zir chian hnuah ṭha an tihte chu an rawt mai dawn a ni.

Selection Committee-ah hian chairman chu Chief Minister a ni a, member-te chu Speaker, Opposition/Group Leader leh Gauhati High Court (GHC) Chief Justice emaw a aiawh emaw an ni.

GHC-in a aiawha mem­ber tura a ruat chu hmun dangah Chief Justice-in a awm tawh a; hemi chungchangah hian L&J department hotute chuan, ṭhutkhawm dawn hunah GHC Chief Justice chuan amah a kal loh pawhin a aiawh a tir mai tura an ngaih thu an sawi.

Selection Committee hian Search Committee aṭanga rawtna lut aṭangin Lokayukta chairperson leh member turte an thlang dawn a, rawtna lut zinga mi ni lo pawh duh an neih chuan an thlang thei tho bawk.

L&J department hotute chuan, Lokayukta ṭha tak neih an duh avangin thil tih zung zung theih a ni lo tih an sawi a, "A tir aṭanga Lokayukta ṭha tak neih kan duh. Lokayukta neih ve a, ṭha tak tak si lo neih kan duh lo. Chuvangin, thil tih vut vut theih a ni lo," an ti. Kumin sorkar kum chhungin Lokayukta din hman a nih loh tur thu an lo sawi tawh a ni.

Cabinet meeting hnu­hnung berin Lokayukta atana post 35 siam a phal angin L&J department chuan post-te hnawhkhat turin ruahmanna a kalpui mek a, post ṭhenkhat chu MPSC kaltlanga lak a ngai dawn.

Lokayukta pisa tur pawh tihfel thawkhat a ni tawh a, enfiah ngaite enfiah a ni hnuah pawm a nih chuan in neitute nen inremna siam a ni ang. Pisa atan hian tender chhuah a ni a, chhangtu hrang hrangte aṭangin office atana ṭha ber tura hriat thlan a ni.