KHAWTHLIR

Indian Bank
Sorkar hnuaia bank pakhat, Indian Bank chuan Aizawlah branch an din thar a, nimin khan Vanglaini editor K Sapdanga'n a hawng. Indian Bank hi kum 1907-a din niin, Chennai-ah hmunpui an nei a, India ramah branch 2,594 leh thawktu mi 20,661 an nei. Mizorama Indian Bank branch hmasa ber awmna hi Chanmari-ah a ni.

Legal Aid Clinic
Mizoram Legal Services Authority leh Hrangbana College-a Legal Cell-te chuan, nimin khan Hrangbana College-ah Legal Aid Clinic an buatsaih a, Higher & Technical Education minister R Romawia'n a hawng. Legal Aid Clinic hi Pachhunga University College, Hindi Training College, Mizoram Law College leh khaw hrang hrangahte hawn a ni tawh.

Tlân phal lo
Traffic SP chuan thupek chhuahin, SIPMIU-in Bawngkawn thlanmual kawngah pipe phûm hna March 6-13 chhung an thawh dawn avangin, hna thawh hun chhungin lirthei tlan phal a nih loh thu leh, hna thawktute tibuai thei tura kawng sira lirthei dah a khap.

Police training
Mamit district police chuan, nimin khan Mamit SP conference hall-ah an district chhunga police officer-te tan 'Crime Scene' chungchang zirna an buatsaih a, Mamit SP Abhiseheak Dhania-a'n a hawng. Training-ah hian mi 14 an tel a, vawiinah chhunzawm a ni ang.

Faina zirho
SIRD&PR chuan nimin khan Kolasib leh Mamitah, 'Training on Swachh Bharat Mission (SBM) for CSO Members' an buatsaih a, India ram vawn fai pawimawhzia leh hmalak dan turte zirho a ni.

Sorkar tihdikna
Sorkar chuan thuchhuah siamin, ni 6.3.2017 -a press release an siama 'ESI hnuaia hamṭhatnate hi thlakhata Rs. 15,000 leh a aia tlem hlawhte tan dawn theih a ni' tih chu Rs. 20,000 leh a aia tlem hlawhte tana dawn theih tih zawk tur a ni.