Nu rawngbawlna pawimawh ber - Chhungkua - Social Welfare Minister

Social Welfare minister PC Lalthanliana chuan, nute rawngbawlna pawimawh ber chhungkua a ni tih sawiin, "Eng dang mah luahlantir chi a ni lo," a ti.

MHIP Hnahthial Block-in nimina Hnahthial Bazar market building-a silver jubilee an lawmnaah thu sawiin, Minister chuan, "Mimal nunin chhungkaw nun a siam a, chhungkaw nunin khawtlang nun a siam a, khawtlang nunin ram nun a siam. Vawiina a pawimawh lai ber chu chhungkaw nun hi a ni," a ti a; chutah chuan hmeichhiate chu hmun pawimawh ber luahtute an nih thu a sawi.

PC Lalthanliana chuan, MHIP member-te chu khawtlang nun a ṭhat zawk theihna tur te, ram nun a felfai theihna tur leh chhungkuaa an mawhphurhnate chu dah pawimawh ber turin a chah a; khawtlang leh pawlah tela inhman tur a nih thu a sawi rualin, "Nute'na kan rawngbawlna pawimawh ber chhungkua hi a ni a, eng dang mah luahlantir chi a ni lo. Chhungkua kal kân a, khawtlang leh kohhran rawngbawlte hi a ṭha ber lo. A pawimawh ber chu chhungkua a ni," a ti.

SWD Minister chuan, sorkarah hmei­chhiate'n duhsakna nasa tak an dawn thu sawiin, "Term hmasa aṭangin Aizawl Municipal Council, local council leh village council-ahte reservation siamsak an ni a, tunah chuan khawtlang leh ram rêlnaah mawhphurhna sang tak chelh hmeichhia an awm ta," a ti a; hmeichhe pawimawhna leh mawhphurhnate chu humhalhsak zel a ṭul thu a sawi.