Lungleiah SEDP zirchianna buatsaih

MNF party chuan nimin khan Lunglei Bazar Veng YMA Hall-ah an policy leh programme thar, Socio Economic Development Programme (SEDP) chungchang zirchianna an buatsaih a; MNF vice president leh Policies & Programs Committee chairman Dr R Lalthangliana'n SEDP a sawifiah.

Dr R Lalthangliana chuan, Mizo mipuite tana tih tur pawimawh hmasa chu inthlan leha Congress party tihtlak a nih thu sawiin, "A bak zawng, mipui leh Zoram hmasawnna tur tak tak chu MNF-in a duang peih tawh a ni," a ti a; India ramah Congress party sorkar an tlachhia a, Mizoramah pawh Congress party chu an tla ngei dawn tih a chiang niin a sawi.

Pathianin MNF-te chu sorkarna a chantir leh ngei dawn nia sawiin, R Lalthangliana chuan, "Tun hnaiah Zoram hmun hrang hrang aṭangin mi thar tam tak lawm luh a ni a, MNF party boruak hian len lam a pan zel a ni," a ti.

MNF Vice President chuan, SEDP chu March 23, 2017-ah MNF president Zoramthanga'n Aizawlah a tlangzarh dawn bakah, district hrang hrangah tlangzarh a ni nghal dawn tih a sawi a; "Kan ram leh hnam damna leh dinchhuahna tur programme a nih dawn avang Committee pawhin an uluk em em a, kum khat chhungin vawi 22 ṭhutkhawm a ni," a ti a, SEDP chu Mizoram tan a hlu hle niin a sawi.

MNF-in SEDP zir­chianna an buatsaihah hian Lunglei khawpuia MNF hruaitute an tel a ni.