MZP-in Mamit College khâr an titawp

MZP headquarters, Mamit chuan Mamit College-a assistant professor Lalrinchhana, Department of Education thlaktu awm loa Serchhip College-a sawn a nih an duh loh vanga tiam chin awm loa Mamit College an khârsak chu nimin khan an titawp.

Mamit MZP thuchhuah tarlan danin, an phût angin Mizoram sorkarin Lalrinchhana transfer order chu nimin khan a sût a, sorkarin an thil phût a tihhlawhtlin avangin Mamit College an khârsak pawh nimin chhun dar 1 khan an titawp a ni.

An ngenna leh duhna sorkarin a tihlawhtling chu lawmawm an tih thu tarlangin Mamit MZP chuan, "Transfer order cancel a nih theih nana bialtu MLA John Rotluangliana hmalakna fakawm kan ti a, a chungah lawmthu kan sawi a ni," an ti a; hun lo kal zel turah pawh Mamit College-a zirtirtute chu thlaktu awm lo chuan hmun danga sawn an remtih loh thu an tarlang.

Mamit MZP chuan, Mamit College-a thawk tura lak Zosangliana Zuala, assistant professor, Department of English pawh tuna J Thankima College-a dah (attached) mekna aṭangin March 2017 ral hma ngeia Mamit College-a dah turin thuneitute an beisei tih an tarlang bawk.