Subscriber ṭha lawmman dawn lawm

Directorate of Accounts & Treasuries chuan, National Pension System (NPS) enkawlnaa subscriber ṭha ber lawmman an dawn chu nimin khan Chanmari YMA Hall-ah an lawm a, Planning minister Lalsawta'n a hmanpui.

Lalsawta chuan, Accounts & Treasuries-in lawmman an dawng chu chhuan­awm a tih thu sawiin, "Lawmman in dawn hi department-a thawkte chauh ni lo, Mizoram mipui tan pawh thu lawm­awm a ni. India ram state changkang tam tak kara Mizoram, internet leh kawng hrang hranga harsatna neiin lawm­man a dawng thei hi a ropui hle," a ti.

Planning Minister chuan, sorkar hnathawkte chu ramin a thawh tur zawng zawng khawihtu an nih thu sawiin, "A bul aṭanga a lèr thlenga khawih leh hre vektu an ni a, sorkar, politician leh ram mipuite pawhin an lo mawipui ve ṭhin a ni," a ti a; sorkar hnathawkte'n sorkarin policy leh programme a neihte ṭha taka an hlen chhuah zel chuan ramin din chhuah a hlat loh tur thu a sawi.

NPS hi January 1, 2004 leh a hnu lama sor­kar hna ngheta thawkte tan hman ṭan a ni a, Mizoramah chuan September 1, 2010 leh a hnu lama sorkar hnathawk a ngheta lakte tan hman ve ṭan a ni. Tunah hian Mizoramah NPS zawmtu mi 5,262 an awm.

NPS Award hi category pathum - subscriber 1,50,000 aia tam nei chin, 50,001-1,50,000 inkar leh 50,000 nei chinah ṭhen a ni a; Mizoram hian subscriber 50,000 nei chinah lawmman an dawng a, lawmman hi Delhi-ah an dawng a ni.