Millionaire nih ṭeuh theihna kan ramah dah a ni - CM Zorama

Nimin aṭang khan Aijal Club Park-ah ni thum awh tur Horticulture Fair, 2022 ṭan a ni. Fair hawngtu chief minister Zoramthanga, Horticulture department changtu chuan, Pathianin millionaire nih ṭeuh theihna Mizoramah a dah thu a sawi.

Horticulture director Dr Elizabeth Saipari kaihhruai inkhawmah hian Chief Minister chuan, "Millionaire nih ṭeuh theihna kan ramah Lalpa'n a dah. A tam lutuk malsawmna min pek hi, tláng ram nei lo, ram lum em emte'n an awt hle. Kan lâk chhuah a, a petu tum dan anga hman hi kan bat ve a ni. Kan hmaa chona awm hi ngaihtuahna thar nen i thlir ang u," a ti.

CM Zoramthanga chuan, Mizoramah ram ruak a tam thu sawiin, "Insem ta ila, chhungkaw tin ṭín 30/40-in min daih vek ang. Ṭín 10 hmun hi nuai tam lutuk thar theihna a ni a, a hman dan thiam tur. Ram, ruahtui leh thil dangah Mizoramah harsatna a awm lo," a ti a; a hlâwk dawn chuan Mizote chu hnam thatchhia an nih loh thu a sawi.

Thlai thar chhuahte chu a hralhna tur pahnih a awm thu sawiin CM Zorama chuan, "Pakhatna chu ram chhunga hralh a ni a, chhungkaw nuai hnih âwrh chauh kan nih avangin hausakna tham a tling. Zoram páwn market hi a pui ber tur a ni. Miin eng nge an duh tih ngaihtuahin, chu'ng chu loneitute kan chìntir tur a ni. A pawimawh ber chu a hralhna ṭha tur, mi dangte kan el phâkna tur a ni," a ti.

Zoramthanga chuan, Mizorama ṭha si, a phurh chhuahna lama harsa lutuk lo, sâwngbàwl ngai lo leh sâwngbàwl ngai a nih pawha Mizorama tih theih ngaihtuah chhuah tum turin Horticulture department-a mithiamte a chah a, "Tam tham law law, cheng vaibelchhe tél, a nuai tél law law hralh tham tura hmalak a ngai," tiin, loneitute thlai tharte hralhna tur ngaihtuah lâwk vek ṭul a tih thu a sawi.

Chief Minister chuan, hmathlir tel loa kal a ṭhat loh thu sawiin, "Hmathlir neih a ngai. Kum 10, 20, 30-a zawh chi pawh a awm ang. Hruaitu chuan hmathlir kan nei tur a ni a, thawktu leh ṭhangtharte pawhin an neih a ngai," a ti bawk.

Inkhawmah hian Horticulture Development Board vice chairman Prof. F Lalnunmawia, MLA pawhin thu a sawi.

Horticulture Fair-ah hian Tualte Tomato Growers Cooperative Society Ltd hnenah State Horticulture Award hlan a ni a, award hian thuchei leh Rs. 20,000 a keng. District tin aṭangin Best Horticulture Farmers thlan a ni bawk a, thuchei leh Rs. 10,000 ṭheuh hlan a ni.