Chhiatna laka invèn dan tur sawiho

Disaster Management & Rehabilitation (DMR) department leh GeoHazards Society-te chuan nimin khan ATI Auditorium-ah 'Revisiting the Aizawl scenario - A workshop to improve disaster resilience in Aizawl and beyond' tih thupui hmangin zirhona an buatsaih a, DMR minister Lalchamliana leh National Disaster Management Authority (NDMA) member Krishna S Vatsa ten an hmanpui.

Minister Lalchamliana chuan, lirnghing leh leimin laka inven himna tur leh inbuatsaih lâwkna kawngah sorkar department te, mithiam bik te, tlawmngai pawlte nen thawhhona ṭha tak an neih reng a pawimawh thu a sawi a, "15th Finance Commission (2021-2026)-in hun hmasa lama awm ngai lo Mitigation leh Preparedness & Capacity Building atana sum a hranpaa an dah hian chhiatna hmachhawn tura inbuatsaihnaah hma min sawntir ngei ka ring," a ti.

DMR Minister chuan, Hun­thar Venga lei tlahniam véng tura NDMA-in sum a ruahman chu lawmawm a tih thu sawiin, "He lei tlahniam hian National Highway a hnawh pin ṭhin avangin Mizoram pumin harsatna kan tawh phah ṭhin a, tunah erawh chuan hetiang harsatna hi kan tâwk tawh lo a, hna pawh thawh zawh ṭêp a ni tawh," a ti a; Mizorama chhiatna thlen hlauhawmna hmuna hmalakna atan cheng vbc. 351.22 hû project 17 siamin NDMA-ah an thehlut tawh tih sawiin, bawhzui sak turin Krishna S Vatsa a ngen a ni.

NDMA member Krishna S Vatsa chuan, tlang rama khawpuite tun hnai kum 30 chhunga an ṭhan dan a inang tlang tih sawiin, "In sak dan leh kawngpui sial dante a inang deuh vek a, in sak dan him lo a tam avangin a thlamuanthlak loh hle. Urban plan­ning mumal leh awmze nei leh huai taka kan kalpui ngam a ngai tawh," a ti.

DMR department, GeoHazards Society leh GeoHazards Interna­tional-te chuan kum 2013 khan Aizawl khaw­pui lirnghing 7.0 richter scale-in a nuai palha chhiatna thlen dan tur an lo zir chiang tawh a, zirchianna chu workshop-ah hian sawiho a ni.