DIET péng kawng CM-in a hawng ; Vision hi a thleng kim nghal lo - CM

Cheng nuai 237.91 hmanga siam thar DIET, Chaltlang péng (Chaltlang to Ramhlun North) kawng siamṭhat thar chu nimin zing khan chief minister Zoramthanga'n a hawng. Chief Minister chuan, tuna an vision-te chu a thleng kim nghal kher lo tih a sawi.

Chief Minister Zoramthanga chuan, sawia tihhlawhtlin si loh chungchang sawiin, "Kum khata tihpuitlin tur chi a awm a, kum 10-a tihpuitlin tur chi a awm. Kan dam chhung pawha kan tihpuiltin hman loh tur chi a awm bawk. Vision hi ṭhangthar lo kal zel turte'n an chhunzawm tura ruangám kan pek a ṭul," a ti.

Switzerland of the East chung­chang sawiin CM Zorama chuan, "Tuna kan vision hi a thleng kim nghal lo. Aizawl khawpui pawh vision kan nei a, Bawngkawnah, Vaivakawnah fly-over i ṭan ang u, kan ti a, kan bei a, kan nawr ngat ngat a. A theih chin main line-ah chuan kawng chhâwng lo chuan kan insu dar dawn lo, motor a pung zel si. LMV tal kawng chhâwngah kan ti a, inbeih nan tak kan hmang zui," a ti a; kawng chhâwng atan work order an la siam lo a, an vision an sawi tih a sawi.

Chief Minister chuan lei verh chungchang sawiin, "A thei tih hretute chuan an verh zung zung. Sairang rél kawng do kânna tur ban pawh a ṭhen chu metre 130-a sáng a ni. Mite'n an tih theih chu vision neiin kan ti ve tur a ni. Tlachawp vision ram rorelna chu a mâwlmang em mai. Farfetch vision hi Zoram tan a pawimawh a ni," a ti.

Zoramthanga chuan, PAHOSS chungchang sawiin, "Nuihza siam nan hmang mah se, kan tichho zel a, a ṭha tulh tulh. Covid-in min tihbuai avangin kan thawk thei lo a, tunah chuan hma kan sawn zel," a ti a; garage peih tawhte zingah thla khatah Rs 1,40,000 la lut an awm thu a sawi.

Mizoramin vision nei ṭhangthar, vision nei hna thawktu leh engineer, vision nei politician leh ram hruaitu a mamawh tih sawiin CM Zorama chuan, "Kan vision chu tunah tih theih loh mah se, kum khat hnu, kum 10 hnu, kum 20 hnu pawh a ni ang. Ṭhangtharte tan a ruangámpui a awm tur a ni. Tichuan, ráltiang kan kài vena tur a ni e," a ti.

Chief Minister chuan, Aizawl khawpuia kawng pawimawh tak pakhat siamṭhaa hman theih a ni ta chu lawmawm a tih thu sawiin, hmasawn belhna tur, siamṭhat ngai leh hmalakna tur tam tak Aizawlah ringawt pawh a awm thu a sawi.

Kawng siamna atan hian UDPA sum nuai 80.96, PWD sum nuai 103.82 leh additional fund nuai 53.13 hman a ni a; November 2, 2021-ah hna thawh ṭan niin, spot quotation leh departmental work-a thawh a ni. Metre 320-a thui, metre 8-a zau a ni a, retaining wall pariat, RCC frame retaining wall pahnih, masonry side drain metre 320-a thui leh RCC balcony metre 60-a thui siam tel a ni.